Biziń kishkene qaharmanımız Qanlıkól rayonındaǵı 22-sanlı ulıwma bilim beriw mektebiniń 5-klass oqıwshısı Tumaris Saparbaeva kelesheginen úmit kúttiretuǵın náwshelerimizdiń biri. Onıń ele kishkene bolıwına qaramastan óziniń aldına qoyǵan maqsetlerine umtılısın, talapshańlıǵın kórip, háwesimiz keldi. Shınında da, Tumarıs teńleslerine úlgi bolatuǵınday bilimli, zeyinli, ónerli qız. Klasında eń úlgili oqıwshılardıń biri. Ásirese, onıń qaraqalpaq tili hám ádebiyatı, biologiya pánlerine bolǵan qızıǵıwshılıǵı joqarı. Anası Peruza hárdayım qızına hár qıylı ádebiy kitaplar satıp ákelip berip, kitaplar tek ǵana jetiklikke jetekleytuǵının tákirar-tákirar násiyatlawdan sharshamaydı. Tuńǵısh qızı bolǵanlıqtan ol anasınıń jaqın járdemshisi, qol-qanatı. Úy-jumıslarına beyim Tumaris hesh tınıp-tınshımaydı. Awıl qızlarına tán iybeliligi, miynet súygishligi dárhal kózge taslanadı. Tań azannan erte turıp, anasınıń bir jaǵında qol-kómegin tiygizip júrgeni-júrgen. Tawıqlarına, mal-eshkilerine qaraydı, ot-jemin beredi. Báhárde bolsa Saparbay atasına kómekshi bolıp, birgelikte úyiniń janındaǵı atızına hár qıylı náller egedi. Onıń óz waqtınan únemli paydalana biliwine, erisken tabıslarına qızıǵıp, anası Peruza Kazaqbaevadan jáne qanday óneri bar ekenligin soradıq. “Shańaraǵımda eki perzentim bar, qızım tuńǵıshım. Tumaris júdá tırısqaq, qızıǵıwshań. Oǵan bos waqtın rejelestiriwge, miynetten qashpawǵa kishkeneleginen úyretkenbiz. Ásirese, oqıwına úlgeriwine kóbirek dıqqat awdaraman. Gezi kelgende marapatın beremen, ol onnan sayın tolqınlanıp, oqıwǵa, óner úyreniwge degen qushtarlıǵı artadı. Toqımashılıq ónerine júdá ıqlaslı. Miynet páni muǵallimi Gúlzada Dawletyarovadan eń birinshi sabaǵında toqımashılıqtı úyrengen kúnnen baslap shıntlap izine túsip aldı. Házir hár qıylı úy-buyımların, jeńsiz, shulıqlardı erkin toqıy aladı. Qızımdaǵı bunday qábiletti kórip ózimde súysinemen. Onıń hár bir tabısı bizler ushın úlken quwanısh, qızımdı bárqulla qollap-quwatlap jáne de jetiskenliklerge talpındırıwǵa háreket etemiz”,-deydi anası tolıp-tasıp.
Tumaristiń hár tárepleme shaqqan, zeyini ilgir, qábiletli bolıwında álbette, ustazlarınıń miyneti joqarı. Klass basshısı qaraqalpaq tili hám ádebiyatı páni muǵallimi Ótebiyke Nagizova da bul oqıwshısın maqtanısh penen tilge aladı, basqalarǵa órnek etedi. Hár tárepleme belsendiligi menen kózge túsken Tumaris bir qatar jarıslarda da jaqsı nátiyjelerge erisip kiyatır. Ol 2023-jılı “Kamalak juldızları” balalar dóretiwshilik festivalınıń rayonlıq basqıshında toqımashılıq óneri menen qatnasıp, 1-orındı aldı hám respublikalıq basqıshqa tabıslı qatnasıp qayttı. “Men bul festivalǵa qatnasqannan soń ele de óz ónerimdi tereńirek úyreniwim kerek ekenligimdi uqtım hám álbette respublikalıq basqıshta jeńimpaz bolıwdı niyet ettim”,-deydi Tumaris. Qaharmanımız bul qızıǵıwshılıqları menen sheklenip qalmaslıǵın, úlkeygende shıpaker bolmaqshı ekenligin sáwbetimiz barısında bilip aldıq. Kishkene júregine ullı niyetlerdi túygen qaharmanımızdı naǵız qaraqalpaqtıń alǵan baǵıtınan qaytpaytuǵın márt Tumaris tımsalında kórgendey boldıq. Qanlıkólli kishkene Tumaris eleberin talay tabısları menen ata-anasın, ustazların quwanta beredi. Biz buǵan isenemiz, sebebi onda intá hám talpınıs bar.
Z.Isakova
