Tasta gúllegen mehir
-Tasta gúller óse me?-dedi bir kúni redakciyaǵa kelgen oqıwshılardıń biri.
-Álbette, insan qálbindegi tasqa mehir gúller ósedi. Bul ushın hár qanday insan ashıq júzli, shiyrin sózli, kishipeyil bolıwı kerek. Sizler bir ǵana shiyrin sóz arqalı adam ómirine burılıs jasawıńız múmkin,-dedi tájiriybeli hám nuranıy ustazımız Dariyxa apa Úbbiniyazova.
Onıń kabineti hár kúni balalarǵa tolı bolatuǵın edi. Sebebi, balalar qálbine jol tawıp, olardıń móldiregen kózlerinen qanday da bir qapashılıqtı uǵar edi. Al, oqıwshılardıń bir talay dápter- dápter betlerinde olardıń turmısları ay sáwlesindey ayqın kóriner edi. Kishkene ǵana júrekleri qanasına sıymay, ústi-ústine urıp turǵan kózlerinen ishki sezimlerdi ańlay aldı. Dariyxa apanıń átirapın orap alǵan balalar, mine usınday insanǵa oy salatuǵın sorawlar menen kómip taslaytuǵın edi. Esikten ustaz benen xoshlasıp atırǵan hár bir náwshe ózine úlken azıq alıp, solǵın júzleri gúl-gúl jaynap, quwanıshtan tolıp-tasıp qaytar edi. Óytkeni, olardıń kópshiligi kewli yarım yaki qanday da bir túskinlikke túsken balalar-dá.
Minekey, usınday jas áwladlardı aydın keleshekke batıl qádem taslawına sebepshi bolǵan ustazımız Dariyxa apanıń júdá kóp miynetleri bar.
«Tabıstıń gilti — miynette»
Búgin 60 jastı qarsı alıp atırǵan Dariyxa apa kóp jıllıq tájiriybege iye insan. Ol 1964-jılı Kegeyli rayonında dúnyaǵa keledi. 1981- jılı paytaxtımızdaǵı 6-sanlı orta mektepti tabıslı tamamlaydı. Dóretiwshilikke bolǵan ıqlası onı Berdaq atındaǵı QMU Filologiya fakulteti Jurnalistika bólimine baǵdarlaydı. Bul oqıw ornında óziniń bilimi, dóretiwshilik qábileti menen ustazlarınıń kózine túsedi. 1988-jılı oqıwdı tabıslı tamamlap, sol jılı dáslepki miynet jolın «Qaraqalpaqstan jasları» gazetasında arnawlı xabarshı xızmetinen baslaydı. Ol jurnalist sıpatında jaslar mashqalaları hám onıń sheshimleri tuwralı sın maqalalardı dóretip, kópshiliktiń dıqqat-itibarın tartadı. Jumıstaǵı belsendilik hám kásibine degen súyispenshilik onıń jáne de qáleminiń ısılıwına túrtki boladı. Sonlıqtan da, onı 1994-jılı gazetanıń bólim baslıǵı hám 1996-jılı bas redaktor wazıypaların atqarıw júkletiledi.
2000-jıldan baslap Qaraqalpaqstan balaları hám jas óspirimleri gazetası «Jetkinshek»te juwaplı xatker lawazımında nátiyjeli jumıslardı alıp bardı. Ol keleshegimiz bolǵan jas áwladlardı ádep-ikramlı, ana Watan tuyǵısı ruwxında tárbiyalawda, olardıń dúnyaǵa jańasha kóz- qarasın qáliplestiriwde, milliy ǵárezsizlik ideyaların sanasına sińdiriwde, tasada qalǵan talantlı balalardı qollap-quwatlap, olardı júzege shıǵarıwda minsiz xızmet etti.
Redakciya janınan shólkemlestirilgen «Dilwar» jas xabarshılar klubınıń aǵzaların jámiyette óz ornına ılayıq bolıwda, elimizdegi Zulfiya atındaǵı mámleketlik sıylıqqa iye bolǵan Nesiybeli Mámbetrzaeva, Qumar Bekniyazova, marhum Ayjamal Joldasbaeva, Ayjamal Káramatdinova, Shaxzada Bazarbaeva hám basqa da qızlarımızdıń dóretiwshilik ustazı boldı.
Kásiples ustazımız Dariyxa apanıń hár bir isin maqtanısh penen tilge alsaq arzıydı. «Tabıstıń gilti-miynette» degenindey onıń kásibine degen pidayılıq xızmetleri jiyi-jiyi húkimetimiz basshıları, baspasóz hám bilimlendiriw tarawları basshıları tárepinen ılayıqlı bahalanıp barıldı.
Atap aytqanda, 2012-jılı «Qaraqalpaqstan Xalıq bilimlendiriw aǵlası» kókirek nıshanına iye boldı. Ózbekstan Respublikası G’árezsizliginiń 10, 25, 30 jıllıq bayramlarında kókirek belgileri menen sıylıqlandı. Sonday-aq, kásiplik sheberligi, jas áwladlarǵa órnek sıpatındaǵı is-tájiriybeleri húkimetimiz tárepinen múnásip bahalanıp, «Qaraqalpaqstanǵa miyneti sińgen jurnalist» ataǵı berildi.
Haqıyqatında da, Dariyxa apa bul sıylıqlarǵa ılayıq. Miynetten baxıtqa bólengen óz kásibiniń pidayı jankúyeri.
«Balalar meni kóklerge kóterdi»
-Men qanday tabıslarǵa erisken bolsam olardıń sebepshisi bul- girbińsiz, appaq qaǵazday pák kewilli balalar. Olardıń arasında júrip, ózimdi sonday baxtıyar sezindim. Hátteki, biz bilmegen hám kewil bólmegen sabaqlardı balalar úyretedi. Olardan kóp nárseni úyreniw múmkin. Men olardıń hár qıylı halattaǵı minezlerin, kishkene bolsa da danalıq gáplerine tásiyin qaldım. Óytkeni, ibrattı úlkenler de kishkenelerden úyreniw kerekligin ańladım. Basım shıǵarmalarımnıń kópshiligi balalar turmısınan alınǵan. Balalar dúnyasınan qálem terbetkenim, meni kóklerge kóterdi. Olar arqalı «Jetkinshek» gazetası redakciyasınıń «Dariyxa apası» bolıw baxtına eristim,- deydi ol tolqınlanıp.
Balalar shayırı Xalmurat Saparov jıynalıs waqıtlarında:
— «Gazetanıń juwaplı xatkeri bul- redakciyanıń júregi esaplanadı. Ol hár tárepleme bilimli, kúshli, oratorlıq qábiletke iye shaqqan, tájiriybeli xızmetker ǵana alıp bara aladı»,-dep aytar edi. Bul táriypler álbette, Dariyxa apaǵa ǵana tiyisli edi. Shınında da, ol balalar qálbine jol taba aldı. Olardıń júrek dúrsildisin, dártin esite aldı. Dóretiwshilikke ıqlas qoyǵan hár bir balaǵa hám mehir, hám sabaq bere aldı. Sonlıqtan da, onıń tayarlaǵan shákirtleriniń kópshiligi Dariyxa apanı maqtanısh penen tilge alıp, bárha húrmetlegenin gazeta tigindilerdegi oqıwshılardıń jazǵan maqalalarınan bayqawǵa boladı.
Dariyxa apanıń usı waqıtqa shekemgi balalar ómirinen jazılǵan gúrriń, povestleri talay ǵana. «Balalar ushın gúrrińler» toplamında «Kitap oqıǵan pıshıq» hám basqa da gúrrińleri toplamda baspadan jarıq kórdi.
Onıń ádep-ikramlılıqqa baǵdarlawshı hám tárbiya sabaq alatuǵın gúrrińleri mektep sabaqlıqlarında qoyılıp, jas áwladlardıń tárbiyasına túrtki bolmaqta.
«Ustaz — atańday ullı» degenindey Dariyxa apanı kópshilik ustaz tutınıp, oǵan húrmet kórsetedi. Shákirtleri jiyi-jiyi xabar alıp turadı. Jumıs barısındaǵı hám turmıslıq tájiriybelerinen túygenlerin úyretip, aqıl-keńes beriwden hasla sharshamaydı.
«Men ózimdi balalar arasında baxıtlı sezinemen» degen edi hind danıshpanı. Shınında da, Dariyxa apa balalar dúnyasınıń mehriban hám súykimli ustazı. Sol ushın da, onıń átirapında bárha baxıtlı, baxtıyar balalar oraladı.
Jeńisgúl Ibadullaeva
arnawlı xabarshımız
