Bul maqala Qaraqalpaqstan Respublikası Joqarǵı Keńesi janındaǵı mámleketlik emes kommerciyalıq emes shólkemler hám puqaralıq jámiyetiniń basqa da institutların qollap-quwatlaw jámiyetlik fondı tárepinen shólkemlestirilgen joybarı tiykarında járiyalanbaqta.
Biz jasap atırǵan Qaraqalpaqstan eli sonday ájayıp teberik Watan. Elimizde jıldan-jılǵa hár tárepleme, hár túrli salalarda rawajlanıw kún sayın óspekte. Bunday ózgerislerdi tek ǵana biz sayaxat etip kóre alamız. Jaqında «Jetkinshek» gazetası redakciyası hám Nókis qalasındaǵı 41-sanlı ulıwma bilim beriw mektebiniń 3-klass oqıwshıları menen birgelikte úlkemizdiń ájayıp orınlarına sayaxattı shólkemlestirdik. Yaǵnıy, gózzal paytaxtımızdıń orayında jaylasqan I.V.Savickiy atındaǵı Qaraqalpaq Mámleketlik kórkem óner muzeyi hám qaraqalpaq klassik shayırı sóz zergeri Qosıbay ulı Ájiniyaz shayırdıń estelik maydanlarına sayaxat ettik. Oqıwshılar dúnya júzine ataqlı bolǵan muzey menen jaqınnan tanıstı. Sonday-aq, muzey janında jaylasqan Ájiniyaz shayırdıń estelik ornına bardı. Bul estelik maydanda oqıwshılarǵa «Jetkinshek» gazetasınıń arnawlı xabarshısı Jeńisgúl Ibadullaeva hám 3-klass basshısı Alima Xodjametovalar Ájiniyaz shayırdıń bıyıl tuwılǵanlıǵına 200 jıl tolǵanlıǵın hám onıń tariyxta óziniń ájayıp shıǵarmaları haqqında toqtalıp ótti. Oqıwshılar da shayır dóretpelerinen qosıqlarınan úzindilerdi aytıp berdi.
Bunnan soń, oqıwshılar sayaxattı dawamlap, balalardıń súyikli gazetası bolǵan «Baspasóz úyi» imaratında jaylasqan «Jetkinshek» gazetası redakciyasında miymanda boldı. Olar gazetanıń tariyxı, shıǵıw proccesi menen jaqınnan tanıstı. Sonday-aq, redakciyadaǵı jurnalist aǵa-apalardan maqala, qosıq hám gúrrińlerdi qalay jazıw kerek ekenligi haqqında túsiniklerge iye boldı.
-Bul sayaxat mende ózgeshe tásir qaldırdı. Úlkemizdegi ájayıp orınlar menen tanıstıq. Ásirese, kórnekli shayırımız Ájiniyaz tuwralı kóplegen maǵlıwmatlarǵa iye boldıq. Soń, súyikli gazetamız «Jetkinshek»ke kelgende ádewir tásirlendim. Sebebi, bul gazetanı biz qolımızǵa alıp, ház etip oqıymız, biraq, onıń shıǵıw procesin kórgenimizde kóp ǵana mashaqatlı jumıslar islenetuǵının ańladıq,-deydi 3-«b» klass oqıwshısı Jandos Kazakbaev.
— «Mıń márte esitkennen bir márte kórgen jaqsı» degenindey oqıwshılarǵa biz pedagoglar qansha túsindirip aytsaqta az. Óytkeni, kóz benen kórip, maǵlıwmatlar ala alsa, bul nátiyje olardıń yadında máńgi qaladı. Minekey, oqıwshılarım da paytaxtımızdaǵı estelik orınlarǵa sayaxat etip óz waqıtların mazmunlı ótkeriw menen birgelikte, ruwxıy dúnyasın bayıttı. Sonıń menen bir qatarda redakciyanıń jumısları menen keńnen tanısıp shıqtı. Bul sayaxat ushın redakciya jámáátine óz minnetdarshılıǵımızdı bildiremiz,-deydi Nókis qalasındaǵı 41-sanlı ulıwma bilim beriw mektebiniń 3-klass basshısı Alima Xodjametova.
Shınında da, oqıwshılar bul ájayıp sayaxattan úlken tásirler alǵanlıǵın redakciyadaǵı sáwbetlerinde bildirip ótti. Joybardıń da tiykarǵı maqseti elimizdegi nawqıran áwladlardı ana-Watanǵa sadıq kámil perzentler etip tárbiyalawdan ibarat.
J. Alpısbaeva
