-Aloo, «Jetkinshek» gazetasınıń redakciyası ma? Bizler de biyıl súyikli gazetamız «Jetkinshek»ke jazıldıq,-dep gáp basladı Qanlıkól rayonındaǵı 15-sanlı ulıwma bilim beriw mektebiniń direktorı Marziya Habipova. -Mektebimizge pochtalion kiyatırsa, hátteki, oqıwshılar da búgin gazetanıń taza sanın oqıydı ekenbiz, dep quwanısadı. Sebebi, ondaǵı beriletuǵın qızıqlı maqalalar, qosıqlar hám gúrriń, ertekler júdá ájayıp edi. Ásırese, klublarda beriletuǵın test, krossvord hám rebuslardı tez tabıwǵa asıǵar edi. Bul gazetanı qolıma alar ekenmen, meniń de balalıq waqıtlarım yadıma túsip ketedi. Hár hápteniń tórtinshi kúnin asıǵıslıq penen kúter edik. Óytkeni, onda teńleslerimiz qatarı ózlerimizdiń de dóretpelerimiz járiyalanıp, quwanatuǵın edik. Gazeta oqıwǵa degen ıqlasım júdá bálent. Bul ádetti hátteki shańaraq aǵzalarıma da úgit-násiyatlaǵanman. Al, mektepte de ustaz, muǵallimler hám oqıwshılar gazeta-jurnallardı oqıǵandı jaqsı kóredi. Dárgayımızdaǵı hárbir klass bir dana «Jetkinshek» gazetasına jazıldı. Sebebi, olar gazetanı ustaz hám jaqın dostınday jaqsı kóredi. Gazetanı oqıw arqalı olardıń sana sezimi, aqıl, oyı hám ruwxıy dúnyası bayıp baradı. Ulıwma aytqanda, ruwxıylıq deregi «Jetkinshek» esaplanadı.
Mektebimiz rayon aymaǵınan ádewir shette jaylasqan bolsa da, oqıwshılar alıs demey, oqıwlarǵa júdá belsene qatnasadı. Olar arasında da dóretiwshilik penen shuǵıllanatuǵın oqıwshılar bar. Olardıń shıǵarmaların pochta arqalı jónettik,-deydi ol maqtanısh penen.
Haqıyqatında da, bul mektepte pánlerde «Jetkinshek» gazetasındaǵı maqala, qosıq, gúrriń hám erteklerdi mısal etip, is tájiriybelerinde qollanadı eken. Ásirese, ámeliyatshı psixologlar «Perzentlerimizdiń keleshegine biyparıq bolmayıq!» atamasındaǵı akciyasında «Tórt qádem», «Anama xat», «Siz perzentińizdi bilesizbe?» hám bir qatar shınıǵıwlardı ótkerip, tárbiyalıq áhmiyetke iye maqala hám gúrrińlerdi gazetadan paydalanǵan.
— «Jetkinshek» – bul tek ǵana balalar hám jas óspirimlerdiń gazetası bolıp qoymastan, al úlken jastaǵılardıń da súyıp oqıytuǵın gazetasına aylandı. Shının aytsam «Jetkinshek» gazetası menen 2-klasımnan baslap sırlas dos tutınıp, balalıǵımnıń baxıtlı dáwirlerin birge ótkerdim. Óz maqala, qosıqlarım menen qatnasıp gazetanıń belsendi aǵzasına aylanǵan edim. Tańlawlarǵa qatnastım. Sabırlılıqqa, ádeplilikke, jaqsılıqqa, tuwrılıqqa umtıldırǵan «Jetkinshek» bárhama bizdi tuwrı jolǵa qaray baǵdarladı. Ómirden óz ornımdı iyelewime súyikli gazetam «Jetkinsheg»im jolbasshı boldı.
Házirgi kúnde Qanlıkól rayonı mektepke shekemgi hám mektep bilimlendiriw bólimine qaraslı 15-sanlı mektepte 2013-jıldan berli basshılıq etip atırman.Mektep jámááti hám mektep oqıwshılarına bala tárbiyasında gazetanıń ornı girewli ekenligin oqıwshılarǵa uqtırıp kelmektemiz. Nurlı keleshekke talpındırǵan «Jetkinshek» penen hámiyshe birgemiz,-deydi Marziya apa gazetaǵa degen húrmetin bayanlap.
Álbette, «Gazetanıń ózi bir kúnlik, sózi mıń jıllıq» degenindey birden-bir balalardıń súyikli basılımı «Jetkinshek» gazetasına usınday ruwxıy dúnyası bay basshılar itibar berse, keleshek áwladlardıń hár tárepleme ozıq oylı, kámil insanlar bolıp jetilisiwine túrtki boları anıq. Demek, sizler de perzentlerińizdiń aydın keleshegi jolında ruwxıy dúnyasın bayıtıp barın!
J. Ibadullaeva
