«Qız ósse — eldiń kórki» degenindey qızlarımız ázelden ózleriniń shaqqanlıǵı hám iybeliligi menen belgili. Qumar, Gulayım, Tumaris obrazları tariyxta, ádebiyatta biykar qalmaǵan. Shınında da, olardıń batırlıǵına elege shekem kóplep qızlar háwes etedi. Ata-analar da qızların tárbiyalawda olardı órnek etedi. Qızlarǵa óner úyretiw, olardıń bos waqtın mazmunlı ótkeriw ushın baǵdar berip, durıs jol-joba kórsetiw —ata-analardıń juwapkerli wazıypası.
Barno menen Ayziya Muratovalar da sonday maqtawlı qızlardıń biri. Olar Nókis qalasındaǵı 43-sanlı ulıwma bilim beriw mektebiniń oqıwshıları.Barno 7-klass bolsa, al Ayziya 4-klass oqıwshısı. Olar kishkeneliginen sportqa ıqlas qoydı. Ata-anası olardı sport zalına aparıp, treneri Baxıt Sultamuratovaǵa tapsırdı.
Paytaxtımızdaǵı Gimnastika sport túrlerine qánigelestirilgen sport mektebinde olar sport gimnastikasınıń sırların úyrene basladı. Dáslebinde olar shınıǵıwlardı islewde ádewir qıynaldı. Barno sol waqıtta 9 jasta bolsa, Ayziya 6 jasta edi. Sportta nátiyjege erisiw ushın álbette qatań rejimge, trenerdiń aytqanların buljıtpay orınlawǵa tırısıw kerek. Tazalıq, durıs awqatlanıw, uyqıdan erte turıw, dene shınıǵıwların óz waqtında islew sportshı ushın júdá áhmiyetli. Eń dáslep sport gimnastikasın úyreniwge kelgen bala birden shıyırılıp, jıynalıp formaǵa túse almaydı. Kóp shınıǵıwlardan, tınımsız ter tókkennen keyin nátiyjege erisedi.
Barno menen Ayziya da tap solay kópshilik qatarı qıynaldı. Olar dáslebinde mektepte, soń respublika kóleminde ótkerilgen jarıslarda jaqsı nátiyjelerdi kórsete basladı. Ótken jılı 24-26-iyul sánesinde ótkerilgen 2023-jıl — «Insanǵa itibar hám sapalı bilimlendiriw jılı”nda “Jaz-ótpekte saz” súreni astında Nawayı qalasında 2010-jılı tuwılǵan jas óspirimler arasındaǵı ótkerilgen ashıq birinshilikte 1-orındı aldı. Ótken jılı dekabr ayında sport gimnastikası boyınsha 2010-jılı tuwılǵan jas óspirimler arasında ótkerilgen Qaraqalpaqstan Respublikası ashıq chempionatında birinshi orındı alǵan bolsa, Ayziya da usı jarısta 2013-jıllar tuwılǵan qızlar arasında 2-orındı aldı.
2023-jıl 1-oktyabr “Ustazlar bayramı kúni” Xorezm wálayatında ótkerilgen sport gimnastikası mektepleri arasında ótkerilgen ashıq chempionatta Barno birinshi orındı alǵan bolsa, Ayziya 2-orınǵa ılayıq dep tabıldı.
-Bizler keleshekte Ózbekstan, jáhán chempionatlarına qatnasıp, chempion bolıwdı qáleymiz. Álbette, bunıń ushın sporttan qol úzbeymiz,-deydi apalı-sińliler.
Bizler de, jas náwshelerimizdiń niyetleri joldas bolıwına tileklespiz.
Muqaddas Atabaeva
Nókis qalası
