Mektepte oqıp júrgen waqıtta alǵan bilimniń ornı bólek eken. Mektep bizdi tárbiyalaydı, oqıwshılıq waqıttan baslap óz qabiletińniń ústinde islep, háreket etseń keleshekte óz jónelisińde kóplegen imkaniyatlar esigi ashıladı. Usınday múmkinshiliklerdi bergen “Jetkinshek” gazetası xızmetkerleri, Qaraqalpaqstan Jazıwshılar awqamındaǵı ustazlarım, ózim tálim alǵan Nókis qalasındaǵı 20-sanlı ulıwma bilim beriw mektebindegi ustazlarıma raxmet aytaman. “Jetkinshek” gazetasına ustazım Botakóz Bekniyazova eń dáslepki márte maqala jazıwdı tapsırdı. Sol-sol eken men “Jetkinshek”ten qol úzbedim. Gazetanıń 2018-jılı 24-may 21-sanında “Jelqom” klubında: «Keleshekte yurist qánigeligin iyelewdi qáleymen hám de usı jóneliste oqıw niyetim bar…» degen sózler menen baspadan shıqqan edi. Sol tilegim qabıl boldı. Házirgi kúnde Tashkent yuridikalıq universiteti Xalıqaralıq huqıq hám qiyosiy huqıqtanıwshılıq fakultetiniń 1-kursında oqıp atırman. Óz maqsetime jetistim. Universitet ómirimde júda áhmiyetli. Jańa baǵdarlamalar arqalı shet elde oqıwǵa ketiwge, joybarlar utıwǵa, schoollar sheetlar utıwǵa, magistraturaǵa shet elge grant utıwǵa, mámleketlik stipendiyalarǵa iye bolıwǵa imkaniyat jaratadı. Sonday eken, àlbette buǵan mektepte oqıp júrgen waqıtlarda jıynaǵan tájiriybelerim yaǵnıy dóretiwshilik penen shuǵıllanıp, maqala jazıwdı úyrengenlerim, maqalalarımnıń baspada járiyalanıwı, redaktor jurnalistlerdiń bergen másláhátleri, Jazıwshılar awqamındaǵı ustazlarımnıń úyretkenleri óz kómegin bermekte. Yaǵnıy, ózimniń tańlaǵan huqıq tarawında ilimiy maqalalar jazıwımda, óz pikirimdi erkin jetkize alıwımda, analitikalıq pikirlewdi úyreniwimde, ozıq oylı pikirlewimde paydasın tiygizip atır. Sonday-aq, hátteki mektepti pitkerip atırǵanımda “Altın medal” iyesi boldım, onnan keyin Tashkent qalasında «Mening Yurtim» MY5 telekanalında jumıs isledim.
Sol waqıtlarda balalıqtan berli óz ústimde islegenim paydasın tiygizdi. Sonday-aq, professor, docent, oqıtıwshılar aldında universitettiń belgili minberinde erkin sóyleymen. Mámleketlik kafedrası tárepinen ótkerilgen xalıqaralıq ilimiy ámeliy konferenciyaǵa qatnasıp, sertifikat aldım. Házir de ózim Tashkent qalasında bolıwıma qaramastan “Jetkinshek” gazetasına jazılǵanman, ol meniń balalıq waqıtlarımnan baslap dóretiwshiligimniń órlewine, keleshegimniń aydın bolıwına kómeklesken jolbasshım. Men súyikli gazetamnan qol úzbeymen.
Asiya Aytbaeva
Tashkent mámleketlik yuridikalıq universiteti studenti