Bir kúni Nurayshanıń tuwılǵan kúni boldı. Úyindegiler oǵan planshet sawǵa qıldı. Nurislam bunnan qattı quwandı. Nurislam telefon oynawdı qattı jaqsı kórer edi. Sebebi, endi ol ház etip planshet oynawı múmkin edi-dá. Erteńine ol planshetke oyınlardı wi-fidan ótkerip, oynay basladı. Aradan eki hápte ótip, Nurislam Nurayshadan palanshetin sorap turdı.
-Nurislam, bul planshetti oyın oynaw ushın sawǵa etpedi. Men bunnan elektron kitapxanadan sabaqlıqlar hám ádebiy kitaplardan paydalanaman. Bunnan tısqarı seniń kózińe bolmaydı. Sen saatlap telefonnan paydalanıp, kózińe zıyan keltireseń, dep túsindirdi. Nurislam bolsa, qıńırlıq etip, tıńlamay jılap jiberdi.
-Meyli Nurislam kel, tek 10 minut oynay-ǵoy. Biraq, keyin bereseń sabaq tayarlawım kerek, dep oǵan planshetin berip turdı. Nurislam quwana-quwana onı alıp, arǵı bólmege kirip ketti. Birazdan soń, Nuraysha planshetin úkesinen sorap alıp qoydı.
Erteńine Nurislam baqshaǵa barǵısı kelmey qaldı. Ol ájapasınıń oqıwǵa ketiwin kútti. Soń, onıń bólmesindegi stoldıń tartpasınan planshetti alıp, oyınlardı oynay basladı. Ol sol oyınnan túske shekem tınbastan oynadı. Ájapasınıń keletuǵın waqtın bilip, planshetti jasırıwǵa háreketlendi. Onı úy ishine jasırayın dese dem de tawıp alatuǵınday túyildi. Sırtqa shıǵıp telefondı jasıratuǵın orındı izledi. Hár jerdi bir tintip kórdi. Biraq, dalaǵa jasırıp qoysa basqa birew alıp ketetuǵınday sezdi. Daladan qaytadan ishke kelip, asxana táreptegi kórpesheniń astına jasırıp qoydı.
Tús waqtı da boldı. Nuraysha oqıwdan kelip, sumkasındaǵı kitapların tartpaǵa jaylastırdı. Qarasa, plansheti joq. Sol átiraptıń bárin kózden ótkerdi. Planshet tabılmaǵannan soń, úkesi Nurislam alǵanlıǵın bildi. Úkesinen soraǵanında almaǵanlıǵın ayttı. Jan-jaqtı izledi, aqırı taba almaǵan soń, anasınan soradı. Ol da kórmegenligin hám barlıq jerdi jaqsılap qarawın ayttı. Nuraysha planshetiniń joǵalıp ketkenine bir túrli boldı. Hátteki, kózlerine jas aldı.
Keshki payıt Nuraysha anasına asxanada awqat asıwǵa kómeklesti. Barlıq jumıslardı bolǵannan soń, anası sol átiraptaǵı kórpesheni qattı qaǵıp jibergende planshet tars etip jerge tústi. Qarasa, bayaǵı izlep júrgen planshet. Onıń beti shıl-párshe bolıp sındı. Nuraysha bunı kórip, birden kózlerine jas quyılıp ketti. Bunı úkesi Nurislam jasırıp qoyǵanın bildi. Onı atın aytıp baqırıp shaqıra basladı. Nurislam bolsa, bul ashshı dawıstan qattı qorqıp shifanerge jasırındı. Anası bolsa, olardı jubatıwǵa kirisip, pármana boldı. Sonda anasi:
-Men sizlerge planshet alıp berip qátelesken ekenmen. Onıń ornına bir qansha kitaplardı alıp beriwim kerek eken dep, pushayman bola basladı. — Meyli balalarım, endi men sizlerge ertek, ádebiy kitaplardı sawǵa etemen. Sonda sizler bunday etip qızǵanshaqlıq etpeysiz hám kitaplardı talasıp oqısańız men júdá quwanar edim,-dep olardı jubatqan boldı.
Aradan bir neshe kúnler ótkennen soń, anası olarǵa kitaplardı sawǵa etti. Buǵan Nurislam kónlikpedi. Biraq, ájapası erteklerdi oqıp bergeninde qunt penen tıńlap otırdı. Bul halattan anası úlken quwanıshqa bólendi.
Shaxsánem Jaqsılıkova
Moynaq rayonındaǵı 3-sanlı Tilewbergen Jumamuratov atındaǵı ayırım tillerge tereńlestirilip oqıtılatuǵın klasları bar ulıwma bilim beriw mektebiniń 10-klass oqıwshısı
