Respublikalıq Bárkamal áwlad balalar mektebi tárepinen iyul ayı «Jańa imkaniyatlar» aylıǵı dep járiyalandı. Aylıq sheńberinde «Dúnya milliy ayaq oyınları» tańlawınıń Qaraqalpaqstan Respublikası basqıshı bolıp ótti. Tańlaw paytaxtımızdaǵı 22-sanlı balalar muzıka hám kórkem-óner mektebinde bolıp, oǵan 100 den aslam oqıwshılar qatnastı. Tańlaw nátiyjesine bola, respublikalıq «Bárkamal áwlad» balalar mektebiniń «Tumaris qızları» toparı birinshi orındı iyelep, Ózbekstan Respublikası basqıshına jollama aldı. Biz búgin maqalamızda «Tumaris qızları» toparınıń aǵzası Ayjamal Begimova haqqında sóz etemiz.
Ayjamal paytaxtımızdaǵı 11-sanlı ulıwma bilim beriw mektebiniń 6-klasın tamamladı. Ol baslawısh klastan baslap jaqsı bahalarǵa oqıp, ustazlar názerine tústi. Klass basshısı Liza Nuratdinova Ayjamaldı maqtawlı oqıwshılarımnan biri deydi. Sebebi kishkene waqtında oǵan kempir apası Gúlayım onda kitapqa mehirdi oyatıp, kóp ertekler aytıp beretuǵın edi. Álbette, ertekler balalardı jaqsılıqqa jeteleydi. Shańaraqta alınǵan tárbiya Ayjamaldı talapshań hám kitapqumar qızǵa aylandırdı. Ayjamal dáslep mektepte ótkerilgen hár túrli jarıslarda baslawshılıq etti. Sońınan bul qızıǵıwshılıq onı baslawshılıqtı haqıyqıy sınap kóriw ushın Qaraqalpaqstan televideniesine jeteledi.
Ol Qaraqalpaqstan telekanalındaǵı «Balalar studiyası» kórsetiwinde «Balalar dúnyası» rubrikasında baslawshılıq etti. Házirgi waqıtta bolsa Qaraqalpaqstan radiokanalında «Jańa áwlad» esittiriwine qatnasıp kelmekte.
Ayjamal júdá qızıǵıwshań, qábiletli qız. Ol duwtar shertiwge, ayaq oyın oynawǵa qızıǵadı. Inglis tilin de úyrenip atır. Jazǵı dem alısta Respublikalıq «Bárkamal áwlad» mektebine barıp, ustazı M.Ótexanovadan ayaq oyın sırların úyrenip atır. Ol házir «Tumaris qızları» toparında «Dúnya milliy ayaq oyınları» tańlawınıń Ózbekstan Respublikası basqıshına tayarlanıp atır. Biz Ayjamalǵa bálent párwazlar tileymiz. Ata-anası, ustazlarınıń isenimin aqlap, ózi árman etkendey talantlı jurnalist bolıwına isenemiz.
I.Xojamuratova
arnawlı xabarshımız
