-Muǵallim ol kim? Men qashan mektepke baraman? Usınday sorawlardı úkem Janadil Berdimuratov dóndirip taslar edi. Ol usı jılı Nókis qalasındaǵı 28-sanlı fizika pánine qánigelestirilgen tayanısh mektebiniń 1-«g» klasına oqıwǵa bardı.

-Mektep júdá zor eken. Muǵallimim shiyrin sózli hám mehriban. Balalar bolsa, «5» bahasın alıw ushın jarısadı. Ustazım Sayra Adilova klasımdaǵı hárbir oqıwshını jaqsı kórip erkeletedi. Sabaqlardı ájayıp etip túsindiredi. Klasım sulıw etip bezetilgen. Doslarım kóp. Endi men muǵallim hám mektep ne ekenin bildim,-deydi úkem tásirleri haqqında.

Janadil úkem ásirese, Prezident sawǵalarınan júdá quwanıshta. Hár kúni ayrıqsha bahalardı alıp keledi.

Shınında da, muǵallim ol anańday mehriban. Mektepte yarım mezgil waqtımızdı ustazlarımız benen birgelikte ótkerip, tálim-tárbiya alamız.

«Ustaz atańday ullı» degen dana xalqımız. Sizler ustazlarıńızdı sıylap, aytqanların orınlasańız, álbette, olar sizlerdi jaqsı kóredi. Bilimli bolıp, mekteptiń aǵla oqıwshıları bolıp jetilisesiz,-deydi anam Sayora.

Sonlıqtan da, bizler ustazlarımızdı bárha qádirleymiz. Bárshe ustazlarımdı hám ózimniń klass basshım Fatima Imamovanı da bayramları menen qutlıqlayman! Keleshek áwladlardı tárbiyalawda hasla sharshamań!

 

Durdana Berdimuratova

Paytaxtımızdaǵı 28-sanlı fizika pánine qánigelestirilgen tayanısh mek­tebiniń 4-klass oqıwshısı