«Jetkinshek» gazetası respublikamızda kóp jıllıq tarıyxqa iye, kópshilikke ustazlıq etken, dóretiwshilikke ıqlas qoyǵan  talay belgili insanlardıń dóretpelerin sınnan ótkergen, olardıń qálemin ısıldırǵan,  sarras 90 jılǵa shamalas tariyxqa iye úlken tárbiya mektebi, jas náwshelerdiń miy­netlerin doslarına  bahalatqan, talantlılarǵa qanat qomlatqan naǵız dóre­tiwshiliktiń qaynaǵan bulaǵı. Bunı gazeta menen dos bolǵan, sırlas bolǵan onıń hár bir sanın asıǵıslıq penen kútken, «Jetkinshek»ten nár alıp ósken, jetilisken balalar júdá jaqsı túsinedi. Al, tilekke qarsı aramızda ele gazetanı qolına uslap kór­megen oqıwshılar da ushırasadı. Redakciya jámááti  gazetanı oqıwshılarǵa jaqınnan tanıstırıw hám dosların arttırıw maqsetinde balalar arasında ushırasıwlarǵa barıwdan, olar menen pikir almasıwdan sharshamaydı. Sebebi, -««Jetkinshek» – tárbiya oshaǵı». Jaqında usı atamada paytaxtımızdaǵı 20-sanlı ulıwma bilim beriw mektebinde ushırasıw keshesi bolıp ótti. Ushırasıw mekteptiń qaraqalpaq tili hám ádebiyatı hám qazaq tili hám ádebiyatı páni muǵallimleri tárepinen shólkemlestirildi. Ilajǵa oqıtıwshılar, ata-analar hám mektep oqıwshıları qatnastı.

Dáslep kesheni Nókis qalalıq xalıq bilimlendiriw bólimi metodisti D.Aytmuratova  kiris sóz benen ashtı. Sońınan mektep muǵallimi Aynash Dáwletmuratova mekteptegi bilimlendiriw barısında erisilgen jetiskenlikler haqqında aytıp berdi.  Bunnan soń, sóz náwbeti “Jetkinshek” gazetasınıń juwaplı xatkeri Dariyxa apa Úbbiniyazovaǵa berildi.

Dariyxa apa Úbbiniyazova balalardı «Jetkinshek» gazetası redakciyası tárepinen ámelge asırılǵan jumıslar haqqında aytıp berdi. Ol óz sózinde balalarımız biziń elimizdiń keleshegi ekenligin, bárqulla kitap hám gazeta menen dos tutınıw lazımlıǵın, izleniwden toqtamay, dóretiwshilik etiwde hesh ekilenbesten ózlerin oylandırǵan hám qızıqlı waqıyalardı jazıp, redakciyaǵa jollaw kerekligin túsindirdi. Redakciya janınan shólkemlestirilgen «Dilwar» jas xabarshılar dógeregi haqqında hám olar arasınan kóplegen talantlı qızlarımızdıń Zulfiya atındaǵı mámleketlik sıylıqlarǵa iye bolǵanlıǵı, bir qansha oqıwshılarımız jámiyette ózleriniń salmaqlı ornına iye bolǵanlıǵı, dógerek aǵzaları menen jiyi-jiyi «Jası úlken áwlad penen ushırasıw» atamasında elimizge belgili insanlar menen ushırasıw kesheleri ótkerilgenligi haqqında keń túrde aytıp berdi. Usı 20-sanlı mektepten talantlı qızlar Ulbosın Ábdiǵalieva, Asiya Aytbaevalar da gazeta menen doslasıp, kóplegen tabıslarǵa eriskenin atap ótti. Ásirese, balalar dóretiwshiliginen, gazetanıń turaqlı oqıwshıları ómirinen alınǵan waqıyalar haqqında aytıp berdi. Dáriyxa apa óz sózinde gazeta menen balalar arasında ele de baylanıstı kúsheytiw kerekligi haqqında da atap ótti.

Bunnan soń, sóz náwbeti balalardıń súyikli shayırı Ózbekstan hám Qaraqalpaqstan Jazıwshılar Awqamı­nıń aǵzası, «Jetkinshek» gazetasınıń ádebiy másláhátshisi Yaqıpbay Ájimovqa berildi. Shayır balalarǵa  óziniń qálemine tiyisli qosıqlarınan oqıp berdi   hám mektep kitapxanasına óz avtorlıǵındaǵı kitaplardan sawǵa etti.

Ushırasıwda mekteptiń oqıwshıları shayır Yaqıpbay Ájimov qálemine tiyisli «Kókkóz, Qarakóz, Úndemes» atlı dóretpesinen saxnalıq kórinis  atqardı. Sonday-aq, mekteptiń talantlı oqıwshıları atqarıwında ayaq oyınlar oynap, qosıqlar atqarıp kelgen miymanlar keypiyatın kóterdi.

Bunnan soń, mektep jámááti tárepinen redakciyamız redaktorı Z.Isakovaǵa «Alǵısnama» tapsırıldı hám miymanlarǵa ádebiy kitaplar sawǵa etildi. Jáne de mekteptiń qazaq tili hám ádebiyatı páni muǵallimi B.Bekniyazova, Z.Jańabergenova, A.Dáwletmuratova, Z.Qutlımuratova hám basqa da ilájdı shólkemlestirgen muǵallimlerge, keshege belsene qatnasqan oqıwshılarǵa «Húrmet jarlıq»ları tapsırıldı. Ushırasıw keshesi júdá tásirli ótti. Biz keleshekte Dilaram Mátkarimova basshılıq etip atırǵan mektepte «Jetkinshek»tiń dosları kóbeye beriwine, gazetamız ıqlasbentleriniń sanı arta beriwine  isenemiz.

E.Xojamuratova

arnawlı xabarshımız