Jazǵı demalıs kúnlerimdi mazmunlı ótkeriw maq­setinde respublikamızda shıǵatuǵın balalar hám jas óspirimlerdiń «Jetkinshek» hám ózbek tilindegi «Tong yulduzi» gazetaların qaldırmastan oqıp baraman. Olardı oqıw arqalı ózime kóp jańalıqlardı alaman. Jaqında «Tong yulduzi» gazetası tárepinen «Inglis tilin úy­renemiz» rubrikası astında «Shet tilin kim biler? Bilgen tez qosıq yadlar!» atamasında tańlaw járiyalandı. Tańlaw shárti boyınsha Ózbekstan xalıq shayırı Erkin Vohidovtıń qálemine tiyisli inglis tiline awdarmalanǵan qosıqtı yadlap, video kórinis túrinde gazetanıń telegramm mánziline jiberiw soralǵan edi. Ózimniń este saqlaw qábiletimdi sınnan ótkeriw hám mekteptegi inglis tili páni ustazım Sáwle Jangeldievanıń bergen bilimlerin aqlaw maqsetinde Ózbekstan kólemindegi mektep oqıwshıları qatarında men de video kórinis túsirip  jiberdim.

Nátiyjede, gazetanıń 29-sanında tańlaw jeńimpazları arasında ózimniń atı, familiyamdı kórip, qattı quwandım. Álbette, bul mendey ápiwayı awıl qızı ushın kútilmegen quwanıshlı waqıya boldı.

 

Sabina Muratbaeva

Qońırat rayonındaǵı 36-sanlı ulıwma bilim beriw mektebiniń oqıwshısı