Jazǵı demalısımdı ádettegidey Shırshıq qalasına jaqın «Oqtosh» degen tawlı aymaqqa demalıwǵa bardım. Ol jerde biyik-biyik tawlar júdá kóp. Tawlardıń arasında jaylasqanlıǵı sebepli, ol jerdiń hawası júdá ıǵal eken. Biyik-biyik tawlardıń shoqqısındaǵı qarlar erip tómenge qaray taslar arasınan aǵıp ótedi. Tawlardıń arasınan aǵıp kelgen bul bulaq suwı júdá muzday hám mazalı eken. Ol jerde bizlerge uqsap dem alıp atırǵan adamlardıń aytıwınsha, bul jerdiń suwı da, hawası da shıpalı eken. Sonıń ushın da adamlar tań sáhárden tawdıń shoqqısına shıǵıp, quyashtıń shıǵıwın kútedi hám taza hawadan dem aladı. Bizler de taza hawadan dem alıw maqsetinde tawdıń tóbesine shıqtıq. Tawdıń shoqqısında turıp gózzal tábiyatımızdı tamashalawdıń ózi-aq insanǵa kúsh beredi eken.

Tábiyatı sonday gózzal, hawası taza jerde  demalısımız júdá mazmunlı boldı. Degen  menen aradan bir hápte ótkennen keyin ózimniń tuwılıp ósken Watanımdı saǵına basladım. Úyge qaytqansha asıqtım. Demalısım juwmaqlanıp Shırshıqtan Tashkent qalası tárepke avtobusqa otırdıq. Avtobusta ketip baratırǵanımızda kóshelerdiń birine «I.Yusupov kóshesi» dep jazılǵanına kózim tústi. Shayır atamızdı bul jaqlarda jaqsı biletuǵınına, tanıytuǵınına quwandım. Usınday ullı insannıń atına qoyılǵan mektepte oqıp atırǵanımnan maqtandım.

Solay etip, óz úyime jetip kel­dim. Házir dem alısımnıń qal­ǵan waqıtlarında súyikli gazetam «Jetkinshek»tiń hár bir sanın qal­dırmay oqıyman hám ózim jazǵan maqalalarımdı redakciyaǵa alıp baraman. Sonday-aq, anamnan bir-birinen shiyrin taǵamlardı pisirip úyrenip atırman. Olardan da qolım bosaǵan waqıtta álbette, kitap oqıyman. Qullası, jazǵı dem alısımnıń hár kúni júdá mazmunlı hám ájayıp bolıp ótip atır.

Áziz, doslar!  Sizler jazǵı dem­alıs kúnlerińizde neler menen shuǵıllanıp atırsız? Hár bir kúniń­izden únemli paydalanıp, kitap oqıń yamasa óner úyreniń! Sebebi, bul kúnler qaytıp kelmeydi. Hám­meńizge demalıs kúnlerińiz maz­munlı ótiwin tileymen!

 

Gúlziyra Bisenbaeva

Paytaxtımızdaǵı I.Yusupov atındaǵı dóretiwshilik mektebiniń oqıwshısı