Ádebiyatqa ıqlasım bálent  bolǵanı ushın qaraqalpaq, ózbek, dúnya ádebiyatınıń dúrdanalarınıń dóretpelerin oqıǵandı jaqsı kó­remen. Sonday-aq, ózim de jiyi-jiyi maqala, qosıq jazıp turaman. Maqala, qosıqlarım súyikli gazetam «Jetkinshek»te tez-tezden basılıp shıǵadı. Sonıń ushın da ata-anam gazetaǵa jazıldırıp berdi. Jaqında redakciyaǵa barıp kelgennen keyin, alǵan tásirlerimdi ata-anama aytıp berip atır edim. Sonda sińlim Indira Babanazarova; -«Ájapa, «Jetkinshek» degen ne?»-dep soradı. Men bolsam; -«Ol kishkene sen hám mendey balalardıń qosıq, gúrriń, maqalaları basılıp shıǵatuǵın gazetası. Onnan kóp nárselerdi úyreneseń»,-dep juwap berdim. Men de kóreyin?!-dedi ol. Men sińlimdi janıma alıp, ózimniń hám doslarımnıń dóretpelerin gazetadan oqıp berdim. Sińlim de qızıǵıp; -«Ája­pa, men de qosıq jazsam bola ma? Meni de «Jet­kinshek»ke alıp barasız ba?-dep qıyıldı. -Qosıq jazıwǵa ıq­lasıń, qızıǵıwshılıǵıń basım bolsa, álbette, jazıwıńa boladı. Erteń seni de redakciyaǵa alıp baraman,-dep sóz berdim.

Tań atqannan sińlim; -«Ájapa, bolıń! Tezirek «Jetkinshek»ke barayıq!»-dep redakciyaǵa jetkenshe asıqtı. Ol jerdegi jurnalist aǵa, apalar menen ta­nıstırdım. Olar da jıllı sózlerin aytıp, qosıq, maqala jazıwdı úy­retip, jol-joba berdi. Sińlim de redakciyaǵa kelip, júdá kóp tásirler menen shıqtı. -Ájapa, bul jerge endi tez-tezden kelip turayıq. Men de endi maqala, qosıq jazıp ákelemen,-dedi sińlim. -Álbette, kelemiz,-dedim sińlimniń ıqlasına quwanıp.

Bizlerdiń hár birimiz benen erinbey sóylesip, jol-joba berip, dóretiwshilikke bolǵan qızıǵıwshılıǵımızdı asırıp atırǵan redakciya jámáátine óz minnetdarshılıǵımdı bil­diremen. Olardıń jumıs­larında tabıs tileymen.

 

Aynura Muratbaeva

Nókis rayonındaǵı 31-sanlı ulıwma bilim beriw mektebiniń oqıwshısı