Jaqında Tashkent wálayatındaǵı «Oq tosh» balalar demalıw orayında Ózbekstannıń túrli aymaqlarındaǵı 600 den aslam balalar hám jas óspirimlerdi birlestirgen «Kamalak» balalar shólkeminiń dástúriy XX anjumanı bolıp ótti.

Anjuman sheńberinde hár turli tańlawlar shól­kemlestirilip, oǵan Qara­qalpaqstan Respublikası qala hám rayonlarınan da bir qansha mektep oqıwshıları qatnastı hám sıylı orınlardı iyelep qayttı. Ilaj dawamında respublikalıq sárdarlar say­lawı da ótkerilip, saylaw juwmaǵında Jaslar awqamı Qaraqalpaqstan Respublikalıq Keńesi baslıǵınıń sárdarlar máseleleri boyınsha más­láhátshisi Tumaris Fay­zullaeva Ózbekstan Jaslar awqamı Ekologiya baǵdarı sárdarı etip saylandı.

Mine, usınday belsendi jaslar baslaması menen paytaxtımızda jaylasqan I.V.Savickiy atındaǵı Qara­qalpaq mámleketlik kórkem óner muzeyinde «Watan doslıq hám baxıtlı balalıq» uranı astında Qaraqalpaqstan Respublikası «Kamalak» balalar shólkeminiń XX anjumanı keń túrde ótkerildi. Ilaj rayonlıq sárdarlar keńesleri tárepinen tayarlanǵan «Fleshmoblar» menen start alıp, baspasóz hám media baǵdarı sárdarları tárepinen diywalı gazetalar islep shıǵıldı. Teńlesleri arasında  qorshaǵan ortalıqtı hám salamatlıqtı qorǵawǵa baǵdarlanǵan Eko­logiya baǵdarı sárdarları tárepinen «Eko taym» akciyası ótkerilgen bolsa, Imkan báǵdarı sárdarları baxıtlı balalıq joybarı menen forum sheńberinde ózleriniń bel­sendiliklerin kórsetti. Forum juwmaǵında hár bir sárdar diplom hám estelik sawǵaları menen sıylıqlandı. Kewilli hám doslıq ruwxında ótkerilgen bunday ilajlar sárdarlardıń iskerligin sı­naqtan ótkeriw menen bir qatarda, olardıń óz-ara birge islesiwin ele de bekkemlep, ózleriniń uqıp hám talantın kórsetiwine imkaniyat jara­tadı.

 

Gúlshiyra ATAMURATOVA

QMUniń studenti