Bir kúni aǵam maǵan; -«Usı bala qatarınan qalmasın» dep telefon alıp berdi. Biraq, qolıma berip atırıp; -«Hesh waqıt telefondı mektepke alıp barmaysań! Telefonǵa úńilip,sabaqqa itibarsız bolmaysań!»-dep shárt qoydı. Quwanǵanımnan aǵama «Tek «bes» bahasına oqıyman,»-dep sóz berdim.

Telefon uslaǵan adam basqasha bolıp ózgeredi eken. Aǵama bergen wádelerimdi de orınlamadım hám telefonnan basımdı kótere almay qaldım. Sabaqlardı da oqıǵandı qoydım. Aǵam bar waqıtta dasturxannıń basına telefonsız kelemen. Al, aǵam joq bolsa telefonnan kóz úzbeymen. Apam: -«Shayıńdı iship alsań-o,balam. Telefon qurǵırdı keyninen oynarsań»,-dese de itibar bermesten, eki kózim telefonda, shala-pala shayımdı iship xanama kirip ketetuǵın boldım. Kóshedegi doslarım telefonımdı sorasa, «Sındırıp alasań,»-dep bermeytuǵın edim.

Klaslas doslarımnıń ayırımları klasqa telefon alıp kelip, oyın oynaytuǵın edi. Bir kúni aǵama aytpay men de klasqa telefon alıp keldim. Balalar menen oyınnıń qızıǵına berilip ketkenimizden, klasqa klass basshımız Arzayım apa kirip kelgenin bayqamay qalıppız. Ustazımız hámmemizdiń telefonımızdı jıynap aldı. Soń; -«Endi mennen telefonıńızdı aǵańız yaki apańız kelip aladı,»-dep baqırdı. Bizler qansha jalınsaq ta telefonımızdı qaytarıp bermedi. Sebebi, Arzayım apa júdá qattıqol ustaz edi. Sabaq tamamlanǵannan soń ustazımız hámmemizdiń ata-anamız benen telefon menen baylanısıp, endi balalarǵa mektepke telefon berip jibermewin eskertti. Arzayım apa ata-analar menen sóylesip bolǵannan soń, bizlerdi qasına shaqırdı. Telefonlarımızdı qolımızǵa berip atırıp;-Endi klasqa telefon alıp ákelseńiz, telefonlarıńızdı qaytarıp bermeymen,-dedi hóktem dawıs penen.

Telefonımdı aldım da qaltama salıp qoydım. Sabaqlar tawsılǵannan keyin úyge kelsem, aǵam kútip otır eken.

-Telefondı mektepke alıp barmaysań, dep edim-ǵo. Nege telefondı meniń ruqsatımsız mektepke alıp barasań? Endi telefon degendi umıtasań, sabaq oqıysań,-dep qattı baqırdı.

Aradan bir-eki kún waqıt ótti. Telefondı qolıma uslap qattı oynaǵım keldi hám úydi izley basladım. Aǵam menen apam toyǵa ketkeninen paydalanıp hámme jerdi izlep shıqtım. Hesh jerde joq. Endi, tek aǵamnıń jayında turǵan sandıqtı kórmedim. Sandıqtıń ústindegi kórpeshelerdi túsirip, sandıqtı ashtım. Telefon kózime «jarıq etip» kórindi. Telefondı qolıma alıp, sandıqtıń awzın jawıp burılǵanım sol, arqamda aǵam tur eken.

-Ne qilıp atırsań?!-dedi de shekeme bir shappat berip jiberdi. -Endi mennen soramay is qılatuǵın boldıń ba?-dep baqırdı.

Qorqqanımnan qolımdaǵı telefon jerge túsip ketti. Men dalaǵa qarap juwırıp shıǵıp kettim. «Gúze kúnde emes, kúninde sınadı» degenindey, men búgin aǵama tutıldım.

Erteńine aǵam maǵan telefonımdı qaytarıp berdi hám maǵan;

-Balam, durıs házir texnologiyanıń rawajlanǵan dáwiri. Qatarıńnan qalmay telefon uslay-ǵoy, biraq, hámme nárseniń shegarası bar. Telefondı kóp oynasań, kóziń de awıradı. Sonıń ushın sabaqlarıńdı tayarlap bolǵannan soń, kóp emes azǵana waqıt oyın oynasań boladı. Aqılıńdı rawajlandırıwǵa járdem beretuǵın oyınlardan oynaysań,-dedi.

Sol kúnnen baslap aǵamnıń ruqsatısız bir nárse islemeytuǵın boldım. Sebebi, elege deyin aǵamnıń bergen shappatın umıtpayman.

 

Xabibulla Ibadullaev

QMUniń jurnalistika qánigeliginiń studenti