Jaqında paytaxtımızdaǵı Prezident mektebi turmısı, ol jerdegi oqıwshılarǵa jaratılǵan imkaniyatlar hám olardıń jetiskenlikleri menen jaqınnan tanısıw maqsetinde usı bilim dárgayında boldıq.

Bilimlendiriw dárgayı esiginen kirgennen baslap diywallarda qıstırılǵan mektep oqıwshılarınıń qolǵa kirgizgen hár qıylı diplom hám sertifikatları, kózdi quwandıratuǵın medalları erksiz dıqqatımdı tarttı. Sonday-aq, oqıwshılardıń foto súwretleri hám olardıń qasında erisken joqarı dárejedegi tabısları haqqında da qısqasha maǵlıwmat berip ótilgen.

Meniń olardı qızıǵıwshılıq penen oqıp turǵanımdı kórgen mektep psixologı Gúlnaz apa Jabbarbergenova qasıma kelip, oqıwshılardıń jetiskenlikleri haqqında aytıp berdi.

-Oqıwshılarımızdıń 2020-2021-oqıw jılın­daǵı jetiskenlikleri tilge tiyek eterliktey. Ásirese, pitkeriwshi klass oqıwshılarımızdan. Nurxat Jumabaev, Miyras Doschanov hám Ziynet Jiyenbaevalar Amerika Qurama Shtatlarınıń Arizona universitetine, B.Joldasbaeva Ullı Britaniyanıń Stirling universitetine qabıl etilgen bolsa, 11-klass oqıwshısı Nursultan Dúysenbaev AQSHtıń Nyu-York qalasında jaylasqan Nyu-York mámleketlik universitetinıń Alabama kampusına oqıwǵa qabıl etilgenligi haqqında xat aldı hám ol 5 sırt el universitetine bir waqıttıń  ózinde qabıllandı,-deydi mektep psixologı.

Shólkemlestirilgenine jańa ǵana eki jıl bolǵan Prezident mektebiniń bunday úlken jetiskenliklerge erisiwiniń sebebi menen qızıqtıq. Bul tiptegi mekteplerdiń basqa mekteplerden parqı onda bilimlendiriw procesine STEAM sisteması engizilgen bolıp, oǵan kóre tábiyǵıy pánler, texnologiya, injinering, kórkem óner hám matematika pánleri jańa innovaciyalıq metodlar arqalı oqıtıladı. Sonlıqtan, hár bir klass eń sońǵı zamanagóy texnologiyalar hám oqıw inventarları menen támiyinlengen.

Oqıwshılardıń hár birine jeke sońǵı túrdegi kompyuter bekitilgen. Sabaqtan tıs waqıtlarında pán dógerekleri, sport sekciyalarına qatnaydı, tariyxıy hám mádeniy orınlarǵa sayaxatlar shólkemlestiriledi.

-Bul jerge oqıwǵa qabıl etilgen kúnnen baslap oqıwǵa degen qızıǵıwshılıǵım ádewir arttı. Kóplegen jetiskenliklerge de eristim. Kishkene waqtımnan baslap unatqan biologiya pánin tereń úyreniwge Prezident mektebinde barlıq múmkinshilikler bar. Bizlerge bul pánnen sırt elli tájiriybeli oqıtıwshı Mark Lester Kabling sabaq beredi,-deydi 9-klass oqıwshısı Manzura Qarlıbaeva.

Prezident mektebiniń ta­lantlı, qábiletli hám bilimli oqıwshıları menen sáwbetleser ekenbiz, olardan kompyuter texnologiyaları boyınsha zeyinli Húrliman Gobenova, inglis tilinen bilgir Arıslan Qalbaev, sportshı qız Nadira Kazakovalardıń kóz­lerindegi bilim-ilimge degen qushtarlıqtı kórip háwesim keldi. Olardıń búgingi alǵan tereń bilimleri — mámleketimizdiń  ke­leshektegi rawajlanıwınıń tiykarı bolıwına isenimimiz kámil. Bul jerdegi bilim beriwge degen jańasha jantasıw waqıt ótiwi menen respublikamızdaǵı ulıwma bilim beriw mekteplerinde de qollanılsa, bilim hám ilimdi iyelewge qushtar mektep oqıwshılarınıń qatarı keńeyiwi anıq.

 

Qundız Ziyrapova

QMUniń jurnalistika tálim baǵdarınıń 3-kurs studenti