Elimizde búgingi kúnde balalar sportın rawajlandırıwǵa ayrıqsha itibar qaratılǵan. Alıs awıllar, sulıw qalalarımızda barlıq imkaniyatlarǵa iye sport mektepleri, maydanshaları jas áwladtı salamat turmıs tárizine baǵdarlawda biyminnet xızmet etpekte. Bul dárgaylarda kishkeneliginen baslap balalarımız ózleri qálegen sport túrleri menen shuǵıllanıp jaqsı nátiyjelerge erispekte. Usınday jetiskenlikleri menen jaqında ǵana jas futbolshılarımız 3-7-iyun kúnleri Sırdárya wálayatında 2008-jılda tuwılǵan jas óspirimler arasında futbol sport túri boyınsha «Sport mektepler futbol ligası»nıń Ózbekstan chempionatında Qaraqalpaqstan Respublikası saylandı komandası sıylı úshinshi orındı iyeledi. Biz jaqında komandanı jarısqa tayarlaǵan trenerler menen sáwbetlestik.
Futbolshıda maqset anıq joba bolmay turıp, toptıń keyninen juwırıp júre berse nátiyjege erisiw qıyın. Futbolshı kúshli, shaqqan, iyiliwsheń hám shıdamlı bolıwı kerek. Ásirese, hár bir sportshıdan tezlik, komanda menen awızbirshilikli hám bir-birin túsinip oynaw talap etiledi. Ligalarda chempion bolǵan qábiletli balalar mine usı pazıyletlerdi jámlep bas trener Islambek Usnatdinov hám járdemshi trener Arıslanbek Qashqınbaevlardıń úyretkenlerin tez ilip alıwǵa háreket etedi.
-Házir koman­damızda 18 bala top tebedi. Bul komanda bunnan úsh jıl burın ashılıp, respublika boyınsha jıynalǵan qábiletli ba­lalardan ibarat. Toparımızda shaqqan futbolshılar júdá kóp. Bul bizlerdiń birinshi nátiyjemiz emes. Usı jıldıń mart ayında Tashkent wálayatında 2008-jılda tuwılǵan jas óspirimler arasında futbol sport túri boyınsha «Sport mektepler futbol ligası»nda da jeńiske erisken edik. Hár bir balamızdıń futbol oyınǵa ıqlası kúshli, hár bir oyınshım maqtawǵa ılayıq. Hújimshiler, qor­ǵawshılar hám dárwazaban, yarım qorǵawshılar barlıǵı ózlerine júk­letilgen wazıypalardı puxta atqaradı. Oyın júdá bellesiwlerge bay boldı. Biziń komandamız Respublika­lıq oyın túrleri hám jeńil atle­tika boyınsha qánigelestirilgen sport mektebine qa­raydı. Oyın­shı­larımızdıń bul sport túrine ıqlası júdá kúshli. Degen menen, bizler tayarlıq ótkeretuǵın sta­dionda gazon joq. Sonlıqtan, jarıslarǵa barǵanda ballarımız usınday gazonlı maydanlarǵa oy­nawǵa birden kónlige almaydı. Ásirese, qıs aylarında balalarımız tayarlanatuǵın stadionda kiyinip sheshiniwge sharayat joq. Olar dalada kiyinip sheshinedi. Shınıqqan futbolshılarımızdı házir Ózbekstan kólemindegi úlken klublar «Bunyodkar», «Metallurg», «Nasaf» , «Paxtakor» komandaları sorap atır. Jas shákirtlerimizden úmitim mol,-deydi Arıslan Qashqınbaev biz benen sáwbette.
«Mıńnan júyrik shıǵadı» dege­nindey millionlar oyınında futbolda eń tez hám shaqqan futbolshılar jeńiske erisedi. Búgin biz kishkene futbolshılardı tabısı menen qut­lıqlaymız. Olarǵa ele de itibar kúsheytilip, komanda ele talay márte chempion bolıwına isenemiz.

E.Xojamuratova
arnawlı xabarshımız