Jaqında biziń mektebimizge I.V.Savickiy atındaǵı Qaraqalpaqstan mámleketlik kórkem óner muzeyi xızmetkerleri tárepinen kóshpeli kórgizbe shólkemlestirildi.

Muzeydiń ilimiy xızmetkerleri muzeydiń ashılıwı, rawajlanıw jolı hám búgingi kúni haqqında kóp maǵlıwmatlar berdi.

Men olardan bul muzeydiń ne ushın I.V.Savickiy atına qoyılǵanın bilip aldım. Sebebi, I.V.Savickiy bul muzeydiń tiykarın salıwshısı eken. Negizinde, ol rossiyalı bir topar arxeologlar menen kelgen xudojnik eken. Tabılǵan arxeologiyalıq buyım­lardıń súwretlerin salǵan. Sońın ala Qaraqalpaqstannıń tábiyatına, kór­kem ónerine, mádeniyatı hám úrp-ádet, salt-dástúrlerine qızıǵıp qalǵan. Muzeydegi derlik kópshilik eksponatlardı Savickiydiń ózi xalıq arasında júrip, jıynaǵan eken. Mine, sol miynetleri ushın da muzey usı insannıń atı menen atalǵan.

1984-jılı 27-iyul kúni uzaq dawam etken kesellikten soń, ol Moskva qalasındaǵı emlewxanada jan beredi. Biraq, onı óziniń qálewi menen Qaraqalpaqstan Respublikasına jerleydi. I.V.Savickiy 2002-jılı Ózbekstan Respublikasınıń birinshi Prezidenti I.Karimov tárepinen «Ullı xızmetleri ushın» ordeni menen sıylıqlanadı.

Mine, kóshpelı muzeydiń kelgeni ushın da usınday bahalı maǵlıwmatlarǵa iye boldım. Muzey jámáátine óz minnetdarshılıǵımdı bildiremen.

Sh.Djannazarova

Xojeli rayonındaǵı 39-sanlı ulıwma bilim beriw mektebiniń 6-klass oqıwshısı