Jaqında mektebimizdiń 4-klass oqıwshıları arasında  bes áhmiyetli baslamanıń tórtinshi baslamasına tiykarlanıp jaslar ruwxıylıǵın jedellestiriw hám oqıwshılardıń bos waqıtların mazmunlı ótkeriw, kitapqumarlıqtı úgit-násiyatlaw maqsetinde «Kitabım-quyashım» atamasında ádebiy keshe bolıp ótti.

Kesheni mektebimizdiń direktorı G.Dáwletova kiris sóz benen ashtı hám kitap oqıwdıń áhmiyeti haqqında aytıp ótti. Bunnan soń, mektep direktorınıń oqıw hám tárbiya isleri boyınsha orınbasarı Sırǵa Berdieva óziniń kitap haqqındaǵı pikirlerin orıs jazıwshısı Lev Tolstoydıń shıǵarmalarınan mısallar keltirip aytıp ótti.

Keshede oqıwshılar kitap haqqında qosıq, taqmaqlar hám danalıq sózlerden aytıp berdi. Gúrriń hám ráwiyatlardan bolsa  saxnalıq kórinislerin sheberlik penen atqarıp shıqtı. Bunnan soń, oqıwshılar ózleri tayarlaǵan ayaq oyınların jıynalǵanlardıń názerine usındı. Keshe júdá qızıqlı hám mazmunlı bolıp ótti.

Indira Jannazarova

Nókis qalasındaǵı 32-sanlı ulıwma bilim beriw mektebiniń qaraqalpaq tili hám ádebiyatı páni muǵallimi