Mektebimizdiń maqtanıshlı oqıw­shılarınıń biri Manzura Dosnazarovanı gazeta ıqlasbentleri jaqsı tanıydı. Sebebi, ol haqqında meniń maqalam ótken jılı «Jetkinshek»te jarıq kordi. Tınıp-tınshımas, bilimli dostımızdıń jáne bir órnek alsa arzıytuǵın aǵla islerin siz doslarıma jetkeriwdi maqul kórdim.

Bir kúni mektebi­mizdiń ximiya páni oqıtıwshısı Zaripa apa Tańirbergenova Man­zuraǵa «Kishkene ustaz» metodınan payda­lanǵan halda kelesi ximiya sabaǵın inglis tilinde ótiwine tapsırma berdi. Manzura da muǵallimniń bul usınısınan hám ise­niminen quwandı. Óytkeni, ol ximiyadan tısqarı inglis tilin de jaqsı ózlestirgeni ushın bul tilde erkin sóyley aladı. Bul tildiń grammatikasında júdá joqarı dárejede biledi.

Solay etip, Manzura kelesi ximiya sabaǵına «Existence elements» yaǵnıy «Elementlerdiń tirishiligi» temasına tayarlanıp, klaslas doslarına «kishkene ustaz» metodı boyınsha sabaq ótiwdi basladı. Manzura oqıwshılarǵa tema boyınsha hár bir maǵlıwmattı dáslep inglis tilinde túsindirip, soń túsinbegenlerin qaraqalpaqsha awdarmasın ayttı. Sabaq dawamında oqıwshılar da Manzuraǵa tema boyınsha ózleriniń qızıqtırǵan sorawların inglis tilinde berip, juwaplar aldı. Sonday-aq, ótilgen tema boyınsha hár qıylı qızıqlı oyınlardı oynaw arqalı da sabaqtı jaqsı ózlestiriwine imkan jarattı. Sabaq sońında Manzura oqıwshılar menen xoshlasıp, olarǵa «Kishkene ustaz» metodı unaǵan bolsa, jáne kelesi sabaqlarda dawam etiwin de aytıp ótti. Kishkene ustazdıń sabaq ótiw usılı bárshege teńdey unap, oqıwshılar sabaǵın asıǵıslıq penen kútetuǵınlıǵın bildirdi.

Manzuranıń sabaq ótiw procesin baqlap otırǵan ustazları Zariypa Tańirbergenova hám inglis tili páni muǵallimi Zuxra Uzaqbaevalar oǵan unamlı pikirlerin bildirdi. Bunday oqıwshı sabaǵı mektepte birinshi ret inglis tilinde ótkerilgenligin ayrıqsha atap ótti. Shınında da, Manzuranıń talapshańlıǵı, talpınısları kóz quwan­dıradı. Onı hárdayım maqtanısh etemiz, onnan úlgi alamız.

Juldız Qıyasova

Paytaxtımızdaǵı I.Yusupov atındaǵı dóretiwshilik mektebiniń oqıwshısı