Jaqında baqshamızda «Baqsha malikası» jarısı bolıp ótti. Jarıstı baqshamızdıń direktorı Húrliman Dawjanova ashıp berdi hám bárshe qatnasıwshı kishkene qızlarǵa áwmet tiledi.

Jarıstı úlken topardıń tárbiyashıları Gúlparshın Seyilxanova hám Mariya Kulımbetovalar alıp bardı. Soń ortaǵa úlken toparda tárbiyalanıp atırǵan 9 qız­dı mirát etti. Kishkene qızlarımız dáslepki sálem­nama shártinde ózlerin jaqsılap tanıstırdı. Keyingi soraw-juwap shártinde bolsa tárbiyashı apalarınıń bergen sorawlarına shaqqanlıq penen juwap berdi. Al, úshinshi aplikaciya islew shártinde bolsa reńli qaǵazlardan óz­leriniń fantaziyaları menen sulıw kórinislerdi isledi.  Keyingi basqısh, yaǵnıy «Anama járdemshimen» shár­tinde de qızlar ózleriniń shaqqanlıǵın, azadalıǵın kórsetip, hár qıylı salat, taǵamlardı sol jerde islep kórsettı. Aqırı, xalqımızda; «Bolar bala bes jasınan belgili» degen gáp bar. Qızlarımız kishkene waqıtlarınan baslap úyinde anasına járdemlesip júrip, kóp nárselerdi úyrenedi. Mine, tórtinshi shártte qızlarımızdıń usı tárepleri sınnan ótkerildi. Eń sońǵı, qızıqlı bolıp ótken besinshi shártte qızlar ózleriniń óner­lerin kórsetti. Onda qızlar hár túrli milletlerdiń ayaq oyınların oynadı. Kishkene qızlarımızdıń shıraylı kiyim­lerde saxnada oyınǵa túsken háreketlerin kórip háwesiń keledi.

Qızlarımızdıń ónerlerin baqlap, bahalap otırǵan tóreshilerimiz olardıń shaq­qanlıǵına, háreketlerine joqarı bahalar qoydı. Nátiyjede, eń joqarı ball toplaǵan eki qızımız Sabrina Ismailova hám Xurziya Utepbergenovalar «Baqsha malikası» boldı. Malika qızlarımızǵa hám jarısqa belsene qatnasqan qızlarımızǵa baqsha jámááti tárepinen sawǵalar tapsırıldı.

Kishkene qızlarımızdıń dáslepki jetiskenlikleri menen qutlıqlaymız hám keleshekte jetiskenlikleri mol qızlar bolıwın tileymiz.

Tursınay Nurlepesova

Paytaxtımızdaǵı 5-sanlı mektepke shekemgi bilim­lendiriw mákemesiniń saz-sáwbet jetekshisi