Ana! Qanshelli qúdiretli sóz. Bul sózge bir sóz benen táriyip beriw júdá qıyın. Olar perzentlerin toǵız ay boyında kóterip, tún uyqısın tórt bólip, aq sút berip, álpeshlep kamalǵa keltiredi. Analar bizler quwansaq quwanadı, qapa bolsaq birge qapa boladı. Olar bizlerdiń baxtımız, barlıǵımız, baylıǵımız. Olar perzentlerin sonday jaqsı kóredi, hátte bizler bilip- bilmey qáte is islep qoyıp, kewline tiyip alsaq ta, dárhal umıtıp, keshirip jiberedi.

Men úyimniń úlken perzentimen. Anam kóp­shilik waqıtları úkemdi maǵan isenip; «Qızım, úkeńe jaqsılap qarap otır. Házir bazarǵa barıp kelemen»-dep tapsırıp ketedi. Sonda balalıǵım basım kelip, kóshede doslarım menen oynap ketip, úkemdi umıtıp ketken kúnlerim kóp boldı. Úyge kelgennen keyin úkemniń bir ózi oynap júrgenin kórip, mennen qapa bolıp turasız. Ashıwlanıp turǵanıńızdı sezip, tómen qarap keshirim sorasam: «Qızım, endigide qaytalanbasın»-dep qattı baqırmaysız da. Sonda ana mehriniń qanshelli keń bolatuǵının sezindim.

Men sizdi sonday qattı jaqsı kóremen, anajan! Siziń aytqan sózlerińizdı buljıtpay orınlawǵa háreket etemen. Jaqsı oqıp, úyrenip, sizge ılayıq perzent bolaman! Anajan aldımızda aman bolıń, máńgi jasań!

Dilnaza Sársenbaeva

Taxtakópir rayonındaǵı 3-sanlı ulıwma bilim beriw mektebiniń 4-klass oqıwshısı