Bir bar eken, bir joq eken, burınǵı ótken zamanda bir patsha bolıptı. Ol elin ádil basqarıptı. Hámme onnan minnetdar bolıptı. Ol jarlı-jaqıbay, jetim-jesirlerdi qollap-quwatlaptı. Patshanıń arqasında, olar jerge, malǵa iye bolıptı. Patshanıń qaramaǵındaǵı adamlardıń kún kórisi jaqsılana baslaptı. Kúnlerden bir kúni patsha qattı nawqaslanıp qalıptı. Onıń úsh balası bolıptı. Patsha kem-kemnen tómenley baslaptı. Ol bir kúni balaların janına shaqırıp alıp: -Balalarım, men qartaydım. Kúnnen-kúnge awırıw janıma batıp atır. Bul turısında meniń kesellikten ayıǵatuǵın túrim joq. Ájelim jaqınlasqan qusaydı. Sonlıqtan, kózimniń tirisinde úshewińizdiń birewińizdi patsha etip tayınlap ketpekshimen,-dep kózlerine erksiz jas alıp, soń sózin jalǵastırıptı.

-Balam, eger sen patsha bolsań? Isti neden baslaysań?-depti úlken ulına.

Ol ári oylanıp, beri oylanıp: -Aǵa, eger men patsha bolsam, patshalıqtaǵı ǵáziyneden jarlı-jaqıbaylarǵa bermegen bolar edim. Olardı elden quwıp jiberer edim. Elimizde tek bay, qurǵın adamlar jasawın qáleymen,-depti.

-Al, senshe-dep ortansha ulına qaraptı.

-Men, men elimizdegi barlıq jarlı-jaqıbaydıń ǵarrısı, jasın jumsap, baylıǵımdı arttırar edim.

Patsha genjetay ulına; -Shıraǵım, patsha bolsań, sen ne isler ediń?-depti.

Genjetayı sál irkilińkirep, ákejan men ele jaspan-ǵoy, kórgenimnen kórmegenim kóp… Ilim, óner úyreniwim, ózimniń qanday insan ekenimdi kórsetiwim ushın, izleniwim kerek-ǵoy!.. Mına, aǵalarımnıń  qaysı biri bosa da siziń jolıńızdı dawam ettirip, xalıqtıń isenimin aqlap, alǵısın alsa, siz qusap eldi ádil basqarsa eken. Patshalıqtan meniń hesh qanday dámem joq,-depti genjetayı.

Patsha ári oylanıp, beri oylanıp bir sheshimge kelipti. Barlıq xalayıqtı sarayǵa jıynatıptı. Ol óziniń jaǵdayın aytıptı.

-Qáne, xalqım úsh balamnıń qaysı biri patshalıqqa múnásip?-depti.

Sonda jıynalǵan alaman; -«Genjetay ulıńız, múnásip»-depti.

Solay etip, genjetay ulına taxtı bosatıp beripti. Biraq, balalarına; -«Óz elińdi, óz xalqıńdı qanshelli jaqsı kórip, mehir berip jasasańız, olarda sizlerdi sonshelli jaqsı kóredi. Áne, kórdińiz-ǵoy, xalıq-tárezi. Bahańdı beredi. Sonlıqtan, sizlerge aytarım «Birlesip kótergen júk jeńil» degendey xalıq penen birge bolıń, zulımlıq etpeń! Birgelesip eldi ádil basqarıń, balalarım!»-depti.

Aradan kóp waqıt ótpey ǵarrı patsha ómirden kóz jumıptı.

Mine, solay etip patshanıń genjetay ulı eldi ádil basqarıp, murat-maqsetine jetipti.

Sabina Aytjanova

Nókis qalasındaǵı 8-sanlı ulıwma bilim beriw mektebiniń 6-«v» klass oqıwshısı