Klasta oqıwshılar bir nárseni bólise almay atırǵanday óz-ara ǵawırlasıp atır. Bir waqıtları ádebiyat páni muǵallimimiz klasqa kirip keldi. Ol sabaqqa qosımsha tárizde ótkerilgen shıǵarmalar tańlawınıń nátiyjesi menen tanıstıra basladı.Hámmesi de jeńimpaz boldım degendey mardıyıp otır.

-«Meniń baylıǵım» atamasındaǵı shıǵarmalar tańlawınıń jeńimpazı Jaqsılıq Ikramov!-dedi ustazımız. Hámme hayran qaldı, hátteki Jaqsılıqtıń ózi de.

-Nege endi Jaqsılıq? Ol qalayınsha shıǵarmanı jaqsı jazad’?-degen sorawdı oqıwshılar ústi-ústine úyip tasladı.

-Ne sebep Jaqsılıq? Muǵallim, ol bay emes-qo, maqtanıp jazatuǵın hesh nársesi joq. Meniń ákemniń tórt túrli mashinası, dúkanları, qabat-qabat jay­ları, sanaqsız aqshaları bar. Bul klasta hátteki mektepte mennen  bay oqıwshı joq. Nege endi men jeńimpaz bolmadım? Baylıqlarım haqqında hámmesin jazıp edim-ǵo. Al, Jaqsılıq she? Ol ne jazǵan? Jazatuǵınday nesi bar eken onıń?!-dedi jáne bir klaslasımız.

Óz doslarınıń ustazına aytıp atırǵan bunday gáplerin esitip, Jaqsılıq ta ustazına sorawlı názer menen qaradı. Sorawlarǵa kómilip qalǵan muǵallim Jaqsılıqtıń shıǵarmasın hámmege oqıp berdi.

-Men bul dúnyadaǵı eń bay insanman. Meniń baylıǵım-ata-anam, úyimizdiń perishteleri bolǵan atam, kempir apam, ájaǵam, úkem, jaqınlarım hám jaqsı, jaman kúnlerimde bárha qasımda bolǵan doslarım hám olardıń, ózimniń saw-salamat ekenimiz. Áne, usılar meniń eń qımbatlı baylıqlarım. Men olardıń bárqulla janımda bolǵanı, qollap-quwatlap turǵanı ushın da baxıtlıman. Baxtıma allam meni baylıqlarımnan ayırmasın! Sebebi, hesh bir mal-dúnya usı mehri dárya insanlarımnıń bir awız shiyrin sóziniń ornın basa almaydı.

-Mine, oqıwshılar! Ne sebep Jaqsılıqtıń shıǵarması birinshi orındı alǵanın túsingen shıǵarsız. Baylıq degeni mal-dúnya degeni emes. Sizler qáte túsinipsiz. Kimińiz mashinalarıńız, kimińiz jaylarıńız, kimińiz bolsa san-sanaqsız aqshalarıńız haqqında jazıpsız-da, biraq hesh qaysısıńız meniń baylıǵım dep ata-anańızdı, aqshaǵa tawılmaytugın densawlıǵıńızdı jazbapsız. Sizler bir nárseni umıtpań; Ómirde mal-dúnya bári tawıladı, lekin densawlıq, ata-ana, tuwısqanlarımız- bular bizge ǵániymet!

Klasta hámme tım-tırıs bolıp, tómen qarap qaldı.

Periyzat Imamatdinova

Ózbekstan Jaslar awqamı Qaraózek rayonlıq bólimi «Talim» baǵdarınıń sárdarı