Jaqında ǵana 8-mart — Xalıqaralıq hayal-qızlar kúni múnásibeti menen qaraqalpaqstanlı eki qızdıń Zulfiya atındaǵı mámleketlik sıylıqqa miyasar bolıwı gúllán xalqımızdı qos quwanıshqa bóledi. Olardıń biri Tórtkúl rayonındaǵı 12-sanlı ulıwma bilim beriw mektebiniń 10-klass oqıwshısı Shaxzoda Karimbaeva bolsa, ekinshisi Bozataw rayonındaǵı 1-sanlı ulıwma bilim beriw mektebiniń 8-klass oqıwshısı Gúlsánem Orazbaeva bolıp tabıladı.

Shaxzoda Karimbaeva óziniń ziyrekliligi, bilimliligi menen «Jas kitapqumar» tańlawında bir neshe márte qatnasıp, 2019-jılı usı tańlawdıń Ózbekstan Respublikalıq basqıshında 1-orındı iyelep, «Spark» avtomashinası menen sıylıqlanǵanı menen xalqımızǵa keńnen tanıs bolǵan qız. Onıń 2016-jılı «Istiqlol» baspasınan jarıq kórgen «Qálbim quyashısań, Ózbekstanım!», 2018-jılı usı baspadan shıqqan «Dilimdagi mangu bahorim» qosıqlar toplamları da bar. Al, Gúlsánem Orazbaeva bolsa kishkene bolıwına qaramastan sport penen shuǵıllanıp, kóp ǵana jetiskenliklerge erisken hám qosıqlar jazıwǵa da ıqlası bálent, qábiletli qızlarımızdıń biri.

Saltanatlı keshede Prezidentimiz bul sıylıqtı Gúlsánemge tapsırıp atırıp, úlken atalıq miyrim menen «Bul qızımızdıń jazǵan qosıǵın óz awzınan esitip erksiz riyza bolǵanman, men onıń keleshegine isenemen» dep ayrıqsha atap kórsetkeniniń ózi biziń qaraqalpaqstanlı jaslarǵa qanat baǵıshlaydı desek, asıra aytqan bolmaymız. Gúlsánemniń ózinde ele de kóp izleniwge iytermeleydi.

Bul eki talantlı qızlarımızdı Zulfiya atındaǵı mámleketlik sıylıqqa miyasar bolıwı menen shın júrekten qutlıqlaymız! Bul isenim, bul juwapkershilik olardı bunnan da úlken tabıslarǵa erisiwge jeteleytuǵınına isenimimiz kámil.

Sıylıqlarıńız qutlı bolsın, Zulfiyashı qızlar!