-Sherzad, Sherzad aynalayın tur! Azadanıń oyanǵanı qashshan. Turaǵoy, balam.

Gúlshaxa apa hár kúnı Sherzadtı usılay oyatadı. Tańǵı altıda Sherzad shiy­rin uyqısın qıyıp, jıllı kórpesinen  turıp, uyqısınan oyanıwı shárt. Ájapası Azada Ózbekstan chempionı. Azada chempion bolsa, Sherzad nege erte turadı dep oylawıńız múmkin. Qıstıń aylarında  tańǵı altıda dala tastay qarańǵı boladı. Ájapam qorıqpasın dep, Sherzadta qara suw bolıp terlep, ájapasınıń izinen qompańlap juwıra beredi. Sherzad ta ájapasınıń keyninen erip, shep bolǵan joq. 6-klass bolıwına qaramastan gúres sport túrinen eki márte Qaraqalpaqstan chempionı boldı. Azada Medetbaeva paytaxtımızdaǵı 25-sanlı ulıwma bilim beriw mektebiniń 9-klass oqıwshısı. Treneri Shıńǵıs Bimbetovtan gúres sport túriniń sırların úyrenip kelmekte. Azada hár jarısqa atlanarda jası 89 jastan  asqan Medetbay atanıń aq pátiyasın alıp ketedi. Atasınıń, ata-anasınıń aq pátiyası hám treneriniń miynetleri arqasında Azadanıń arqası jerge tiymestey palwan qızǵa aylandı. Ol ótken jılı noyabr ayında 2005-2006-jılları tuwılǵan jas óspirimler hám qızlar arasında ótkerilgen Qaraqalpaqstan chempionatında 57 kg. salmaqta birinshi orındı  iyelegen bolsa, dekabr ayında Xorezm wálayatında ótkerilgen Ózbekstan chem­pionatında ózi qatarlı qızlar arasında gilemge túsip ekinshi orındı jeńip aldı.Usı jıldıń 25-26-yanvar kúnleri jıl atamasına baylanıslı gúres sport túrinen ótkerilgen Nókis qalası prokuror kubogi  jarısında «Eń jaqsı sportshı qız» nominaciyasın aldı. Azada elimizge áyne kirip kelgen kóklem báhár paslın da zor tabıslar menen basladı. 1-mart kúni ózi qatarlı sportshı qızlar arasında ótkerilgen Qaraqalpaqstan chempionatında 1-orındı iyelep, ata-anasın  quwanıshqa bóledi. Azadanıń bul tabısı anası Gúlshaxa apa ushın 8-mart—Hayal-qızlar bayramı ushın berilgen eń úlken sawǵa boldı. Bizlerde elimizde usınday chempion qızlar kóbeyip, islegen tınımsız miynetleriniń jemisi olardı joqarı dárejelerge kótere beriwine tileklespiz.

E.Niyetbaeva