Meniń anam Arıwxan Aytjanova Qaraózek rayonındaǵı 17-sanlı ulıwma bilim beriw mektebinde inglis tili páni oqıtıwshısı. Men anama qanshama táriyp bersem de az. Bilesiz be, bala bolǵannan keyin shoqlıq qılamız, gey­de hádden tısqarı anamızdıń artıqsha mehirin, itibarın kótere almay, ashıwlanıp, qattı sóylep, kewline tiyemiz, qapa etemiz. Biraq, sonda da qátelerimizge kóz jumıp, hár qanday erkeliklerimizdi, qıńırlıqlarımızdı kótergen, zeynine qansha kóp tiysek te, bárháma keshirgen, jıǵılǵanımızda tikeytken, qapa bolsaq jubatqan anamızdan qarızdarmız.

Anajanım-ómirimniń mazmunı. Sizdi júdá-júdá jaqsı kóremen. Bizlerge bergen mehirińiz, tárbiyańız, bári-bári ushın minnetdarman! Siz meniń perishtemsiz, mehir bulaǵımsız! Siz bárqulla kúlip  júrseńiz, mennen baxıtlı, bay insan bolmaydı. Siz meniń júzimdegi shadlıǵımsız, júre­gimniń bir bólegisiz. Siz meni kishkeneligimnen «Jetkinshek» penen doslastırmaǵanıńızda bugin men qaǵaz qaralap otırmaǵan bolar edim. Súyikli gazetam arqalı dóretiwshilik qábiletimdi jetilistirip, ruwxıy dúnyamnıń bayıwında anamnıń xızmeti kóp.

Anajanım biz, balalarıńızdıń baxtına aman bolıń, dúnya turǵansha turǵaysız… Bárqulla perzentlerińizge bas bolıp, aqlıq-shawlıqlar súyiw nesip etsin! Ómirimniń gúli, perishtem-anam men sizdi pútkil barlıǵım menen jaqsı kóremen.

Periyzat Imamatdinova

Qaraózek rayonındaǵı 17-sanlı ulıwma bilim beriw mektebiniń oqıwshısı