Televizor arqalı qılıshpazlıq boyınsha jarıslardı kórip, qızıǵıp júrgen Tumaris Nókis qalasında da qılıshpazlıq mektebiniń bar ekenin esitip, quwanıp ketti. Soń atasınan ol jerge aparıwın ótinish etti. Atası Saliy aǵa Qudaybergenov aqlıǵınıń ıqlasın jıqpay, onı Olimpiya hám milliy sport túrleri boyınsha Nókis joqarı sport sheberligi mektebiniń qılıshpazlıq sportı dógeregine alıp bardı. Tumaris bul jerde ustazları Dástan Tlemisov, Bekmurat Jaqsımuratovlardan qılıshpazlıqtıń sırların úyrendi. 2 jıldan berli us­tazlarınıń miynetlerin aq­laǵan Tumaris hár jılı respublikalıq turnirlerde sıylı orınlardı qolǵa kirgizip kiyatır. Jaqında Tashkent qalasında bolıp ótken Ózbekstan chempionatında 2008-2012-jılǵı qız balalar arasında qılıshpazlıqtıń shpaga jónelisi boyınsha birinshilikti qolǵa kirgizdi.

-Tumaris júdá talapshań qız. Óz ústinde júdá kóp shuǵıllanadı. Mine, sonıń nátiyjesinde Ózbekstan chempionı boldı. Bul chempionatta mektebimizden Dilbar Asetova, Qállibek Qurbanbaev, Qoblan Kamalovlar sıylı 3-orınnıń jeńimpazı boldı. Sonday-aq, jarısta qızlarımız komandası 2-orındı, er balalar komandası  3-orındı jeńip aldı. Jámi 12 sportshımız 10 medal menen elge qayttı. Balalarımızdıń tabısı-bizlerdiń tabısımız. Olardıń hár biriniń jeńisinen quwanamız,-deydi treneri Dástan Tlemisov biz benen sáwbette.

-Bul jeńiste ustazlarımnıń miyneti kóp. Ustazlarıma, ata-anama, atama óz minnetdarshılıǵımdı bildiremen. Keleshekte olar­dıń isenimin aqlap, álbette jáhán chempionı bolıwǵa wáde beremen,-deydi Tumaris óz quwanıshın bólisip.

Biz sóz etip atırǵan Tumaris Salieva paytaxtımızdaǵı 48-sanlı ulıwma bilim beriw mektebiniń 6-klasında oqıp atır. Ol mektebinde de úlgili oqıwshılardıń biri. Mekteptegi jámiyetlik jumıslarǵa da belsene qatnasadı.

Óz ústinde júdá kóp shuǵıllanıw, miynet etiw álbette jeńis alıp keledi. Tumaris te miynetleriniń nátiyjesinde bunnan da joqarı tabıslardı qolǵa kirgiziwine isenemiz hám áwmet tileymiz.

N.Avezova

arnawlı xabarshımız