Redakciyaǵa kúlimsirep qádem atqan júzi ısıq hayal; -Áne, qızım «Jetkinshek»ke keldik. Sanobar ájapańdı qollap-quwatlap, kóklerge kótergen, usı gazeta boladı,-dedi janındaǵı aqlıǵına ámiwdáryalı Hawagúl Aytımbetova.

-Mınaw meniń aqlıǵım Shaxina, 2-klasta oqıydı,-dep gápin jalǵastırdı Hawa­gúl.

-Ájapań Sano­bardı 4-klasında «Jet­kinshek»ke jetelep alıp kelgenmen. Sonnan baslap, onıń gazetaǵa ıqlası arttı. Hár jılı bir jılǵa gazetaǵa jazılıp, ruwxıy azıq aldı. Redakciya tárepinen shól­kemlestirilgen tań­lawlarǵa, ushırasıw ke­shelerine qat­nastı. Tabıs­lardı qolǵa kirgizdi. Tashkentte licey­de, uni­versitette oqıdı. Tashkentte jasap, islep atır. Ájapańnıń usı dárejege jetiwinde «Jetkinshek»tiń xızmeti ayrıqsha. Ájapańa qanat berdi, qollap-quwat­ladı,-dep aqlıqlarıma táki­rar-tákirar aytaman.

Aqlıǵım Shaxina kishkene bolsa da, júdá talapshań. -Apa, meni de «Jetkinshek»ke jazıldırıp beriń! Men de Sanobar ájapama uqsaǵım keledi,-deydi hár kúni. Atası, Shaxinaǵa gazetaǵa jazıl­ǵan kvitanciyanı qolına uslatqanda, ol sonday ushıp-ushıp quwandı.

-Apa, meni de endi «Jet­kinshek»ke alıp barıń,-de­gennen soń, aqlıǵımdı alıp keldim. Aqlıǵıma da jol-joba beriń,-dedi Hawagúl.

-Men de «Jetkinshek»ke maqala jazsam, shıǵa ma?! Qalay, qáytip jazsam boladı?-dedi ol bizge qıyılıp. Biz kishkene Shaxinaǵa jol-joba, másláhát berdik. Ol quwanıp qoya berdi.

-Way, apajan, kelgenimiz jaqsı boldı-ya! Endi jaza beremen, jaza beremen!-dedi isenim menen Shaxina.

-Awa, qızım,-dep ol aqlıǵın maqulladı. -«Jetkinshek» Sanobar ájapańdı ǵana emes, meniń ózime de kóp zat úyretti, ruwxıy azıq aldım. Redakciyanıń ushırasıw ke­shelerine, tańlawlarına talay márte qatnasıp, qızımız benen ekewimiz tolıp-tasıp awılǵa jetkenshe asıqqanbız. Mine, Shaxina janım sen de «Jetkinshek» penen doslasıp atırsań.

-Apa, meni de tez-tez «Jetkinshek»ke alıp kelesiz-ǵo-ya?! Men, men Sanobar ájapama uqsaǵım keledi… Atamnıń «Jetkinshek»ke jazıldırıp bergeni jaqsı boldı. Jańa jılǵa zor sawǵa boldı-ya,-dep Shaxina apasına maqullattı.

Usı jerde Shaxinanıń ájapası Sanobar Jumanova haqqında bir-eki awız aytıp ótiwdi maqul kórdik.

Sanobar kishkene waqtınan baslap «Jetkinshek» benen jaqınnan dos boldı. Hár jılı gazetaǵa birinshilerden bolıp jazılıp, jiyi-jiyi hár jılı dóretpeleri menen qatnastı. Nátiyjede, bul ıqlas, inta onı 9-klasında 2006-jılı Tashkent qalasındaǵı Alisher Nawayı atındaǵı respublika kórkem óner liceyine jeteledi. Liceydi pitkerip, Ózbekstan jáhán tiller universitetiniń xalıqaralıq jurnalistika fakultetine kirip, onı tabıslı tamamladı. Universitette oqıp júrip «Marifat», «Ucitel Uzbekistana» gazetalarında da arnawlı xabarshı bolıp isledi. Magistraturanı da pitkerdi. Oqıp júrip hár qıylı tańlaw, ánjuman, seminarlarǵa qatnasıp, belsendilik kórsetti. Ol házirgi waqıtta Ózbekstan jurnalistika hám ǵalaba kommunikaciyalar universitetiniń úlken oqıtıwshısı bolıp islep atır. Sonıń menen birgelikte qosımsha «Yangi Uzbekistan» gazetasında jumıs islep atır. Sanobar haqqında qanshama aytsaqta kóplik etpeydi. Ol kásibiniń mamanı, jetik qánigesi bolıp jetilisti. «-Meniń usı dáre­jege jetiwimde álbette, meniń balalıqtaǵı sırlasım «Jetkinshek»tiń úlesi bar»,-degen edi ol ilgeride biz benen sáwbette.

Haqıyqatında da, Sanobardıń úkesi kishkene Shaxi­na Bazarbaevanıń talap­shańlıǵı, tal­pınısları bizdi quwandırdı. Ol házirgi waqıtta Ámiwdárya rayonındaǵı 11-sanlı ulıwma bilim beriw mektebiniń 2-klasınıń eń úlgili oqıwshılarınıń biri. Bos waqıtlarında Qıpshaq muzıka hám kórkem óner mektebinde súwretshilik dógeregine qatnaydı. Biz de óz gezeginde Sanobar ájapasınday bolıwdı arzıw etken kishkene Shaxinaǵa  «Jetkinshek»ke atqan qádemiń qutlı bolsın!-deymiz.

D.Ómirbaeva