Ótken jıl meniń ómirimde altın háripler menen jazılatuǵın tariyxqa aylandı. Sebebi, bul jılı meniń aldıma maqset etip qoyǵan  eń úlken jetiskenliklerimniń biri Qaraqalpaqstan Respublikasınan kórkem óner jónelisi boyınsha Zulfiya atındaǵı Mámleketlik sıylıqqa múnásip dep tabılıp, Húrmetli  Prezidentimiz tárepinen sıylıqlandım. Álbette, bul kún men ushın umıtılmas, baxıtlı hám quwanıshlı kóz jaslarǵa tolı kún boldı. Bul sıylıq meniń ómirge degen kóz qarasımdı ózgertti, qalaberse úlken juwapkershilik júkledi.

Zulfiya atındaǵı mámle­ketlik sıylıq 1999-jılı, yaǵ­nıy men tuwılǵan jılı shól­kemlestirilgen. Men bes jıldan berli qatnasıp, be­sinshi jılı yaǵnıy 2020-jılı Zulfiyashı qızlar qa­tarınan orın alǵanımnıń ózi ruwxlandırdı hám tolqınlandırdı. Usı dárejege jetisiwimde ustazlarımnıń miynetleri, ata-anamnıń qollap-quwat­lawlarınıń arqasında dep bilemen hám hámiyshe olardan minnetdarman! Bul sıylıq tek ǵana maǵan berilgen sıylıq emes, bul Húrmetli prezidentimizdiń qaraqalpaq kórkem ónerine, qaraqalpaq qızlarına degen ayrıqsha itibarı hám iseniminiń dáliyli dep bilemen. Bunday isenimdi jan-tánim menen aqlawǵa, milletimizdiń baqsıshılıq ónerin dúnya saxnalarında jańlawına, onıń rawaj­lanıwına ózimniń úlesimdi qosıwǵa há­reket etemen.

Elimizde bolıp atırǵan tilsiz jaw pandemiya dáwirinde de biz dóretiwshi in­sanlar úyimizde otırıp, tınıp qalmadıq. Sebebi, házirgi informaciya-texnologiyaları rawajlanǵan dáwirde  xal­qımızǵa ruwxıy azıq beriw maqsetinde ǵalaba xabar quralları, internet tarmaqları arqalı ózimizdiń video rolik­lerimizdi  jay­ǵastırıp bardıq.

Sonday-aq, házirgi karantin dáwirinde pútkil dúnya júzinde  xalıqaralıq  onlayn konferenciyalar, festivallar, tańlawlar ótkerilip atır. Men de 2020-jılı 13-dekabr kúni Italiyanıń Milan qalasında ótkerilgen “Open Italy” atlı onlayn tańlawında baqsıshılıq jónelisi boyınsha qatnasıp 1-orındı iyelep, laureatı bolıp, diplom menen sıylıqlandım. Jáne de Túrkmenstan Respublikasınıń Ǵárezsizligine—25 jıl tolǵanı menen qutlıqlaw maqsetinde «Túrksaray» birlespesiniń aǵzaları, Túrkiy xalıqlar menen birge túrkmen xalıq qosıǵın onlayn tárizinde atqarıp, Túrkmenstan mádeniyat ministrligi tárepinen «Alǵısnama» menen sıylıqlandım. Sonday-aq, Ájiniyaz atındaǵı Nókis Mamleketlik pedagogikalıq institutınıń muzikalıq tálim baǵdarındaǵı ilimiy basshım, ustazım  Ózbekstan Respublikasına xızmet kórsetken artist Aygúl Nadirova menen birge kóplegen Xalıqaralıq ilimiy jurnallarǵa ilimiy maqalalarım menen qatnasıp, Diplom menen sıylıqlandıq.

Bunnan keyinde usınday úlken isenimdi aqlaw ushın ustazlarımızdıń bergen bilimlerin tereń ózlestirip, elimiz rawajlanıwına óz úlesimdi qosaman dep wáde beremen!

 

Dinara Nuratdinova

Zulfiya atındaǵı mám­leketlik sıylıqtıń laureatı, Ájiniyaz atındaǵı Nókis Mámleketlik pedagogikalıq institutınıń 3-kurs studenti