Men ol waqıtları 5 jasta edim. Anam kún kórisi ushın sirt elge jumıs islewge ketiwge májbúr boldı. Keter waqıtta meni isenimli adamları bolmaǵanlıǵı sebepli Taqıyatas qalasındaǵı «Balalar úyi»niń baslıǵı Anjela apa Umerovaǵa waqıtsha taslap ketti. Ol jerde Anjella apam mehirli qolları menen basımnan sıypap, óz qızınday bawırına tarttı. Óz jaqınımday qáwenderlik etti.

Ol jerde meniń menen qatar qızlar, balalar menen tez til tabısıp, doslasıp aldım. Barlıq sharayatlar jaratılǵan. Hár bir kúnimiz qızıǵarlı ótetuǵın edi. Jiyi-jiyi hár qıylı jarıslar, oyınlar ótkeriledi. Bul jerge elimizge belgili artistler, qızıqshılar, aktyorlar kelip, túrli-túrli koncert baǵdarlamaları, qızıǵarlı kesheler ótkerip, bizlerge sawǵalar berip, quwanıshqa  bóleytuǵın  edi. Bunday qayırlı islerdi Anjela apanıń tikkeley basshılıǵında shólkemlestiriledi. Ol talapshań, tınıp-tınshımaydı. Bárshemizdi óz balasınday kórip, mehribanlıq etedi.

Aradan bir jıl ótkennen keyin, anam meni kelip alıp ketti. Anjela apanıń islegen jaqsılıqların, ǵamxorlıqların bir ómir umıtpayman. Apama súyikli gazetam «Jetkinshek» arqalı minnetdarshılıq  bildirmekshimen! Raxmet sizge, Anjela apa! Sizdi júdá-júdá jaqsı kóremen.

Shınargúl Qosbergenova

Nókis qalasındaǵı 4-sanlı ulıwma bilim beriw mektebiniń 5-klass oqıwshısı