Bıyıl ózbek tiliniń mámleketlik til biyliginiń qabıl etilgenine 31 jıl tolıw múnásibeti menen respublikamızda «Ózbekstan- meniń baxtım, meniń keleshegim» atamasında ózbek tilinde shıǵarmalar tańlawı ótkerildi. Bul tańlawdıń Qaraqalpaqstan Respublikalıq basqıshına mektebimizdiń 10-klass oqıwshısı Lalagúl Nurpolatova da qatnasıp, sıylı 3-orındı alıp, diplom hám sawǵalar menen sıylıqlandı. Dostımnıń bul tabısınan tek ǵana men emes, pútkil mektebimiz jámááti quwanıshqa bólendi. Aqırı, respublikamızdaǵı 33 mektepten qatnasqan oqıwshılar arasınan sıylı orındı alıwı da úlken jetiskenlik.
Lalagúl kishkeneliginen baslap kóbinese ózbek xalıq erteklerin, qosıq, gúrrińlerdi oqıp hám ózbek tilindegi multfilmlerdi kórgenlikten qálbinde bul tilge degen mehiri oyanǵan. Ol Qanlıkól rayonındaǵı 11-sanlı ulıwma bilim beriw mektebinde oqıp júrgen payıtında hár qıylı ózbek tili bayram, jarıslarda óz talantın kórsetip, belsendiligi menen kózge tústi. Ol pán olimpiadasında ózbek tili páni boyınsha sıylı orınlardı aldı. Al, mektep-internatımızǵa kelgennen soń onıń ádebiyatqa degen mehiri jáne de astı. Mektebimizde hár jılı ótkeriletuǵın Á. Nawayı dóretiwshiligine baǵıshlanǵan «Ǵázzel múlkiniń sultanı» atamasındaǵı shı­ǵarmalar tańlawında birinshilikti qoldan bermeydi. Lalagúldıń jaqında bolıp ótken «Ózbekstan-meniń baxtım, meniń keleshegim» ata­masındaǵı respublikalıq shıǵarmalar tańlawına qatnasıp, jeńimpaz bolıwı, onıń ózbek tilin tereń ózlestirgenin, til baylıǵınıń joqarılıǵın kórsetedi.
-Men bul tańlawǵa birinshi ret qatnasqan bolsam da, joqarı nátiyjeni qolǵa kirgiziwimde ádiwli ustazlarım Gúljan apa Abdullaeva hám Dilnoza apa Qurbanbaevalardıń miynetleri ayrıqsha orın tutadı. Olar meniń ózbek tiline bolǵan ıqlasımdı jáne de asırıp, ózlerindegi bar bilim kónlikpelerin jalıqpastan úyretti. Meniń tabısım-ustazlarımnıń, mektebimizdiń tabısı. Men olardan sheksiz min­netdarman. Bul tańlaw arqalı ózbek tiliniń tákirarlanbas til baylıǵın, ullılıǵın tereń sezindim,-deydi dostımız tolqınlanıp. Onıń qunlı shıǵarma dóretiwi de tosınnan emes. Dostım «Jetkinshek» penen jaqın dos. Álbette, súyikli gazetamız benen dos bolǵan hár bir bala jaqsı shıǵarmalar dórete aladı. Mudamı jetiklikke jetelewshi bul gazetaǵa da onıń minnetdarshılıǵı sheksiz.
Lalagúldiń bul tabısı menen qızǵın qutlıqlap, bunnan da bálentlerge párwaz etiwin tileymen.
Juldız QÍYASOVA
Paytaxtımızdaǵı I.Yusupov atındaǵı mámleketlik qánigelestirilgen mektep-internatınıń oqıwshısı