Bir kúni kishkene Ulboǵanǵa anası bazardan gúzli-báhár kiyetuǵın kóylek satıp ákelip berdi. Kóylek júdá sulıw, hár qıylı qaslar, monshaqlar menen bezetilgen. Ulboǵannıń quwanıshınıń shegi joq. -Qızım, kóylekti alıp qoy, qıdırǵanda kiyeseń,-dedi anası.

-Apa-aw, tek bir kún kiyeyinde»,-dedi qızı qıyılıp.

-Yaq, kóylekti kirletip taslaysań, oyınǵa góne kóyleklerińdi kiyeber,-dedi anası sál baqırıńqırap. Ulboǵan anasına ókpelep, bultıyıp otırıp aldı. Ol doslarına taza kóylegin kórsetip, maqtanǵısı kelgen edi-dá. Aqırı anası kóylekti bir kún kiyiwge ruqsat berdi. Ulboǵan quwanǵanınan kóylekti asıǵıslıq penen kiydi de, dalaǵa qaray juwırdı. Japtıń boyında ılaydan oyınshıq soǵıp oynap atırǵan doslarınıń qasına bardı.

-Way-buw, kóylegiń sup-sulıw ǵoy,-dep dosları oyının qoyıp, Ulboǵandı aylanshıqlap aldı. Birewleri ılay qolları menen uslap ta kórdi.

-Jaman qolıń menen uslama kóylegimdi,-dep qolın serpip jiberdi.

-Taza kóylek mende de bar. Biraq, men onı oyınǵa kiymeymen-dá,-dep maqtandı Gúlziyra. Ulboǵan ári-beri doslarınıń oyınına qarap otırıp, zerigip ketti. Soń ózi de oyınǵa qosıldı. Taza kóylegi báribir ılay boldı. Ásirese, bir  jeńi ılay- ılay bolıp qaldı. Ol endi apam baqıradı dep qattı qorqtı. Úyine keliwden qayshı menen kóyleginiń bir jeńin qıyıp tasladı da, kóylekti jasırıp tasladı.

Bir kúni anası úyin jıynastırıp júrip, qızınıń kóylegin tawıp aldı. Qarasa, kóylek ılay, jáne bir jeńi joq.

-Úlboǵan!-dep baqırdı anası ashıwdan tútep.

-Mına kóylektiń bir jeńi qayaqta?

-Men, men onı ılay bolǵannan soń, sizdi baqıradı dep qıyıp tasladım,-dedi qorıqqanınan dawısı dirildep.

-Má, kóylekti kiyip, ekinshi jeńin de ılay qılıp kel. Keyin ekinshi jeńin de qıyıp tasla. Haw ózime aytsań juwıp beremen-ǵoy,-dep kúyip-pisti.

-Men bilmey qaldım,-dep Ulboǵan jılap jiberdi.

Anası taza kóylektiń jeńin qaytadan qurap, tigip berdi. Báribir jeńin qıysıq qıyıp taslaǵannan soń, kóylek shıraylı shıqpadı. Aqırı Ulboǵan taza kóylekti oyınǵa kiyiwge májbúr boldı.

Qumara Sipatdinova

Paytaxtımızdaǵı I.Yusupov atındaǵı mámleketlik qánigelestirilgen mektep-internatınıń oqıwshısı