Mámleketimizde húkim súrip turǵan koronavirus pandemiyası biz oqıwshılarǵa da keri tásirin tiygizbey qalmadı. Oqıwımız onlayn rejege ótti. Sabaqlarımızdı onlayn tárizde tayarlawǵa májbúr boldıq. Bunday sharayatqa úyreniw hár bir oqıwshıǵa qıyınshılıq tuwdırdı. Lekin, keyin ala onlayn tálim alıwǵa da úyrene basladıq. Hátteki, karantin waqtında bos waqtımızdı únemli ótkeriw ushın sociyallıq tarmaqlar arqalı hár qıylı jarıslarǵa, viktorina oyınlarına belsene qatnasıp, «Maqtaw jarlıq»ların aldım.

Minekey, kópten asıǵa kútken taza oqıw jılı da baslandı. 12-oktyabr sánesinen baslap dástúriy tálim alıwǵa kiristik. Bunnan bárshe oqıwshılar quwanıshlı. Ustazlarımız, doslarımız benen kórisip, saǵınıshımızdı bastıq. Mektepke hár kúni saqlanıw nıqabı, antiseptik hám ıǵal salfetkalar menen kelemiz. Mektepke kirerde dene ıssılıǵımız ólshenedi. Aralıqtı saqlaǵan halda karantin qaǵıydalarına qatań ámel etip, sabaqlardı ótip atırmız. Onlayn tárizde oqıw menen dástúriy oqıw arasında úlken parq bar eken. Mektepte oqısaq bilmegenlerimizdi biymálel muǵallimlerden soraymız. Ustazlarımız sabaqların keń túrde túsindiredi. Mektepti saǵınǵan oqıwshılar hár bir sabaqtan qalmay, puqtalıq penen úyreniwge, sabaqların jaqsı ózlestiriwge háreket etip atır. Álbette, hár birimiz ıqlasımızdı tek ǵana oqıp-bilim alıwǵa qaratıp, bilim kónlikpelerimizdi arttırıp baramız.

Shahida Jangabaeva

Nókis qalasındaǵı 30-sanlı ulıwma bilim beriw mektebiniń 6-klass oqıwshısı