Kishkeneliginen atası menen kempir apasınıń qolında tárbiyalanıp, aqıllı, zeyini ilgir, talapshań bolıp ósken Jansáwle ata-anasınıń, ustazlarınıń isenimin aqlap, ullı dárgay Qaraqalpaq Mámleketlik Universitetiniń jurnalistika tálim baǵdarına oqıwǵa kirdi.

Jansáwle Hamidullaeva Shımbay rayonındaǵı 40-sanlı ulıwma bilim beriw mektebiniń qazaq klasında oqıp, bilim aldı. Mektepte oqıp júrgen gezlerinde-aq, ol Kamolot Jaslar jamıyetlik háreketiniń sárdarı boldı. Onıń jetiskenlikleriniń san-sanaǵı joq. Jamiyetlik jumıslarda bárqulla kópshilik teńleslerine úlgi bolıp, mektebiniń maqtanıshına aylandı. Qazaq tili hám ádebiyatı páni boyınsha respublika kólemindegi pán olimpiadalarına tabıslı qatnastı. Jansáwle on barmaǵı oyılǵan ónerli qız. Ol rayondaǵı 8-sanlı Balalar muzıka hám kórkem óner mektebinde ónermentshilik dógereginde ustazınan toqımashılıq, tigiwshilik, kesteshilik, gilemshilik, túrlerin tereńnen úyrendi hám bul jónelisler boyınsha rayonnıń aldıńǵı ónerli qızlarınan bolıp, kóplegen kórgizbelerge, tańlawlarǵa qatnastı. «Jurt keleshegi», «Jas dóretiwshi» respublikalıq tańlawlarda óz miynetleri menen qatnasıp, sıylı orınlardı qolǵa kirgizdi. Zulfiya atındaǵı Mámleketlik sıylıǵına talaban bolıp, respublika basqıshında jaqsı nátiyjelerge eristi. Sonday-aq, ol Shımbay Pedagogika kolledjinde oqıp júrgen payıtında ózbek tili páni boyınsha pán olimpiadasınıń respublikalıq basqıshında eki jıl dawamında 1-orındı aldı.

Tınıp-tınshımas Jansáwle 2017-jılı Ózbekstan Jaslar awqamı Shımbay rayonlıq jetekshiler Keńesi baslıǵı bolıp saylandı hám rayondaǵı bárshe jaslardıń haqıyqıy jetekshisi bola aldı. Oqıwshı-jaslardıń arasına kirip barıp, hár qıylı seminar-treningler shólkemlestirdi. Jaslar menen jaqınnan dos bolıp, olardıń neler menen bánt ekenligin kórip, qızıǵıwshılıqların itibarǵa alıp, óz baslamaları menen shıǵıp, hár qıylı joybarlardı ámelge asırdı.

Jetekshilik qábileti joqarı bolǵan qaharmanımızdıń ádebiyatqa hám ádebiy kitaplarǵa bolǵan mehiri bólek. Ol ózbek, qaraqalpaq, qazaq hám jáhán ádebiyatı kitapların súyip oqıydı. «Kitapqumarlar» turnirlerine de turaqlı túrde qatnasadı. «Aqıllı adam sózin naqılsız aytpas» degendey, Jansáwle menen sáwbetlesken jası úlken menen jası kishilerdiń de zeyni ashıladı. Ol óziniń kishipeyilligi, jankúyerligi, shaqqanliǵı arqasında óz teńlesleri arasında húrmet-izzetke eristi, kóplep doslar arttırdı. Onı kóp qırlı talant iyesi desek asıra aytqan bolmaymız. Maqalaları «Jetkinshek», «Qaraqalpaqstan jasları», «Shımbay hawazı» gazetalarında jarıq kórdi.

Jansáwle menen dospan. Men telegramm sociyallıq tarmaǵında ullı shayır I.Yusupovqa arnap kanal ashıp, shayırdıń dóretiwshiligin en jaydırıw boyınsha birgelikte islep atırmız. Jansáwleniń ózi de ájayip hawazı menen oqıǵan monologların, qosıqların hám jazǵan maqalaların jaylastırıp barıp, jeke dóretiwshilik kanalın ashıp júrgizbekte.

Bilim alıwdan, óner úyreniwden hám izleniwden toqtamaytuǵın «Qálemi hám sózi ótkir jurnalist bolaman» dep maqset qoyǵan dostım Jansáwleniń oqıwlarına tabıslar tileymen.

Islam Xamidullaev

Nókis qalası