Ilgeride «Jetkinshek» gazetasına qaray jol aldım. Tunnelden ótkennen keyin trotuardan jayawlap baratırsam, bir apay hámme jerdi sıpırıp, tazalap, shıǵındılardı tiyisli ornına taslap atır.

Maqalam shıǵıp quwanıshım qoynıma sıymay, gazetamdı qolıma alıp, adı­mımdı tez-tez atıp kiyatırman. Aldımda ketip baratırǵan jas jigit, qolındaǵı bos paketti taslap baratır. Bunnan keyin, jas kelinshek janında eki balası bar. Ózi bolsa, telefonda qattı-qattı sóylep, gá kúledi. Hesh nárse menen isi joq. Eki balasınıń qolında bir-bir banan bar. Ekewi de banannıń qabıǵın arshıp, jep bolıp, qabıǵın ayaq astına tasladı. Onı anası ayaǵı menen tewip, biypárwa telefonnan sóylesiwin dawam etip kete berdi. Men dárhal eńkeyip, banannıń qabıǵın alıp, taslandı taslaytuǵın orınǵa aparıp taslamaqshı boldım. Usı payıtta: -Qoy qızım, ózim alaman, qolıń patas boladı, tárbiyalaǵan ata-anańa raxmet,-dep baǵanaǵı sipsekesh apay, qolımnan banan qabıqların aldı…

Bul kishkene waqıya bolǵanı menen maǵan júdá tásir etti. Paketti taslap baratırǵan jas jigittiń, balalarına banan alıp berip, ózi jámiyetlik orında mádeniyatsızlıǵın kórsetken jas kelin­shektiń háreketlerine ne dewge boladı?! Ózi menen turmay, balalarına da máde­niyatsızlıqtıń úlgisin kórsetip atırǵan joq pa? Ata-ana perzentlerine úlgi bolıwı kerek emes pe?!

Házir qalamızdıń adım jerinde shıǵındı taslaytuǵın orın bar. Soǵan taslawǵa ádetleneyik. Taza­lıq ushın hámme teń háreket eteyik. Qalamızdıń tazalıǵı-biziń tazalıǵımız, salamatlıǵımız, gózzallıǵımız emes pe?!

Gúlnisa ASAMATDINOVA

Paytaxtımızdaǵı I.Yusupov atın­daǵı mámleketlik qánigelestirilgen mektep-internatınıń oqıwshısı