Óziniń aqılgóyligi, keńpeyilligi, mehri­banlıǵı menen hár bir balanı ózine tartatuǵın Gúlsara apa Xalmuratovanıń kásiplik bay­ramı qarsańında úyine barıp; «Ustaz, bay­ramıńız qutlı bolsın!» dep onı quwanttıq. Qartaysa da, onıń kúlimlep turǵan kózlerinen sol alısta qalǵan balalıǵımdaǵı mehriban ustazımdı kórdim. Quwanıshı qoynına sıymay, tolqınlanıp, balalıǵı haqqında gáp basladı.

-Bir kúni sabaqta,-dep ángimesin basladı Gúlsara apa kóz áynegin stoldıń ústine qoyıp. -Muǵallimimiz bir qatar ǵana qosıqtı oqıp beriwimizdi ayttı. Hámme izbe-izlikte qosıqtı oqımaqta. Soń baha qoyıldı. Hámme oqıwshı «4» bahasın aldı. Xalmuratova «5» degen muǵallimnıń gápin esitip, hámme hayran qaldı. Rası ózimde isenbedim. Sebebi, bárimiz de birdey qosıq oqıǵan edik-tá. Keyin bilsek, meniń bir ózim qosıqtaǵı sózlerdi durıs, qátesiz oqıppan. Sonnan mende ustazımnıń dıqqatlıǵı, ustazlıq qábiletine eliklew boldı ma, bul kásipke mehirim oyandı. Qudayǵa shúkir, bul úlken ustaz degen ataqqa da eristik. «Bestóbe»degi 30-sanlı mekteptiń ashılıw máresiminde men de lentasın keskenmen,-dep eske aldı Gúlsara apa.

Ustazım bir neshshe jıllıq miyneti, is tájiriybesi, bilim kónlikpeleri menen jas ustazlarǵa órnek boldı. Pidayılıq, óz kásibine degen mehir, sabırlılıq, talapshańlıq bári-bári qaharmanımızda jámlengen. Sonıń ushın da, ol oqıwshılardıń súyikli ustazı bola aldı. «Men bir nárseni aytaman, ustaz tek ǵana oqıw­shını emes, ol jámiyetti de tárbiyalaydı»,-degen usta­zım­nıń pikiri shınında da orınlı.

Ustazım menen sáwbetlesip otırıp, búgingi kún oqıw­shılarına da pikir bildiriwdi umıtpadı. Búgingi kúni oqıw­shı-jaslarǵa mámleketimiz tárepinen qaratılǵan úlken imkaniyatlardan utımlı payda­lanıwımızdı, oqıp-izleniwden sharshamawdı tákirar-tákirar ayttı. Onnan; «Muǵallim, mámleketlik sıylıq yaki basqa ataqqa iye bolǵansız ba? dep soraǵanımda, ol biraz únsiz turdı. «Rasın aytsam, men qandaydur ataqqa iye bolıw ushın bul kásipti tańlamaǵanman. Kóshede, jámiyetlik orınlarda shákirtlerim meni kórip «ustaz» dep kelip sálemlesiwiniń ózi men ushın úlken ataq, sıylıq»-dedi.

Bilim baǵınıń baǵmanı ustazım Gúlsara apa menen xoshlasar ekenbiz, shákirtleriniń halınan xabar alıp kelgeniniń ózi oǵan sheksiz quwanısh baǵıshlaǵanın ańladım. «Bay­ramda meni umıtpay kelip, qutlıqlaǵanıń ushın raxmet, ósip,ón balam!»-dep aq pátiyasın berdi.

Muxtar Úmbetov

QMUniń jurnalistika tálim baǵdarınıń student