Qaraqalpaq Mámleketlik Quwırshaq teatrında Muǵallimler hám ustazlar kúnine baǵıshlanıp, «Ustaz kórgen shákirt» atamasında spektakl bolıp ótti. Spektakldi saxnalastırıwshı rejissyor  M.Begimov onıń úlken jastaǵı hám mektep jasındaǵı balalar ushın arnalǵanlıǵın atap ótti. Spektakl waqıyaları balalardı jası úlkenge húrmet, kishige izzet kórsetiwge, miynet etiwge, jaqsılıqqa jeteleydi.

Jaslayınan erke ósken Abat  úlkeyip, aǵasınıń bergen aqılların alıp, bir waqıtları aǵasına shákirtlikke túsken ustalardıń aldına barıp, olardan ustashılıq hám temirshilik sırların úyrenedi. Ol us­tazlarınan úyrengen óneri  menen soqqan buyımları arqalı  awıldıń kúnine jarap, olardıń alǵısların aladı. Kúnlerdiń birinde Tawbol-Tasbol degen adam ustanıń qızı Kúnsulıwdı tasqa aylandırıp qoyǵanlıǵınan awıldıń adamları xabar tawıp, olardı qutqarıw ushın jolǵa shıǵadı.  Abat ózi soqqan qılıshı menen aydarhanı hám Tawbol-Tasboldı jeńip, onıń  sıyqırı menen tutqında turǵan Kúnsulıw hám basqalardı azat etip, óz eline qaytaradı. Kúnsulıwdıń shırayına ashıq bolǵan Abat onı óz awılına alıp kelip, birgelikte baxıtlı, tatıw ómir keshiredi.

Aktyorlardıń quwırshaqlardı sheber oynata alıwı, kish­kenelerimizdiń tınımsız qol shappatlawlarına miyassar boldı. Spektaklde M.Bay­niyazov (Abat), P.Qu­lımov (Aydarxa, aǵası), S.Medetova (Shóje, Qoraz, Bayterek), Q.Baymuratova (Jılan), S.Temirxanov (1-usta), A.Jaqsımovlar (2-usta Tawbol- Tasbol) óz róllerin sheberlik penen atqarıp shıqtı.

Z.JUMABAEV

arnawlı xabarshımız