Marziya usı jılı licey­ge oqıwǵa kirdi. Ol usı oqıw ornında ózi qızıqqan inglis tili hám ádebiyatı páninen bilim sırların tereńirek úyreniwdi basladı. Kitaplar onıń eń jaqın dosları bolǵanlıqtan, bos waqtı bolıwdan iri kólemli shıǵarmalardı oqıydı. Usınday kúnlerdiń birinde ol ózinde kóriw qábiletiniń páseygenligin sezdi. Bunı anasına ayttı hám ekewi birgelikte shıpaker kóriginen ótip, kózáynek aldı. Marziya kózáynegin hár kúni oqıwǵa alıp kelip, tek sabaq waqtında ǵana taǵatuǵın edi.

Bir kúni ol sabaqta tánepis payıtında kóz áynegin sheship, parta ústine qoyıp ketti. Klaslası Umida menen asxanaǵa kirdi. Olar jolda kiyatırıp, jańadan ildiriwli turǵan «Pánler olimpiadası»nıń nátiyjelerin kóriw ushın irkildi. Biraq, joqarıdaǵı qaǵazdı kóz áynegi bolmaǵanlıqtan kóre almadı. Umida da kóp kitap oqıǵanlıqtan kózi ázzilegen edi.

Eki dos ta klasına barıwdan, muǵallim de kelip sabaǵın basladı. Marziya taxtadaǵı jazıwdı kórmey, kóz áynegin tıpırshılap izley basladı. Oǵan dostısı Umida da izlese basladı. Biraq, hesh jerde joq. Olardıń biytaqat bolıp bir nárseni izlep atırǵanın sezgen muǵallim, qızlardan ne bolǵanın soradı. Marziya kóz áyneginiń joǵalıp qalǵanlıǵın ayttı. Muǵallim bolsa:

-Qáne, jaqsılap izle, bir jerge qoyǵan shıǵarsań, dım tappasań barǵan jerińdi kór, umıtıp qaldırǵan bolıwıń múmkin,-dedi. Oqıwshılar onıń kóz áynegin kórmegenligin ayttı. Marziya muǵallimnen ruqsat sorap, asxana tárepke ketti. Qıyalında ol kóz áynegin anıq partanıń ústine qoyǵanday edi. Barǵan jerleriniń bárin kórip shıqtı, hesh jerde joq. Klasına qaytıp keldi. Muǵallimine hámme jerdi qarap kelgenligin hám taba almaǵanlıǵın ayttı. Muǵallim Marziyanıń qapa halatın kórip, otırǵan oqıwshılardıń barlıǵınıń sumkaların tekserip shıqtı. Degen menen, Marziya klaslaslarınıń hesh biriniń almaǵanlıǵına isenimi kámil edi. Sebebi, doslarınıń kópshiligi kóz áynek taǵıp júredi. Sol payıtta klass basshısı Daniyar aǵa klasqa kirip keldi. Ol da bul waqıyadan xabar tawıp, tánepis payıtında kim qalǵanlıǵın, qalayınsha kóz áynektiń joytılıp qalǵanlıǵın soradı. Muǵallimniń hóktem dawısınan qorıqqan Polat birden:

-Aydın endi Marziyanıń kóz áynegin bereǵoysesh,-dedi hawlıǵıp sóylep. Bul gápten soń, hámme Aydınǵa qaradı.

-Muǵallim, meni keshiriń, men tek Marziya menen oynamaqshı edim. Oǵan kóz áynegin qaytarıp berejaq edim. Biraq, ol sabaq baslanar waqıtta keldi. Rano muǵallimniń hám klaslaslarımnıń  kózinshe bere almadım. Sebebi, urı degen atqa qalatuǵınım sózsiz edi.

-Aydın sen qara, qansha waqtıńdı zayaǵa ketirdiń, basqalardıń da. Tek ǵana sen emes, ustazıńnıń, doslarıńnıń altın waqıtların urladıń. Waqıttı hesh qashan izge qaytarıwǵa bolmaydı. Qapa etken Marziyanıń awhalın kór,-dedi Daniyar muǵallim baqırıp sóylep. Soń, Rano muǵallim:

-Áne kórdińiz be, oqıwshılar «Oyınnıń azı jaqsı» degenindey, barlıǵıńızdıń «qula­ǵıńızǵa altın sırǵa», qaytıp bunday etip oynawshı bolmań. «Házildiń astı-zil» dep biykarǵa aytpaǵan danalarımız. Sol ushın bar kúshińizdi bilim alıwǵa sarplań,-dep bárshe oqıwshılardı tártipke shaqırdı. Soń, muǵallim olardı tánepiske shıǵarmastan sabaǵın ótti.

Oyınnan oymaq shıǵarǵan Aydın óz isinen pushayman jep, muǵallimlerinen hám dostısı Marziyadan keshirim soradı.

Manzura Tilewbaeva

NMPI janındaǵı akademiyalıq liceydiń oqıwshısı