Gúlayim úyiniń eń genjetayı bolǵanlıqtan júdá erke. Anası erke qızınıń tazalıǵına qattı itibar beredi. Up-uzın shash­ların órip qoyadı.Qızı ne aytsa da orınlaydı.

Gúlayimnıń úyi baq­shasına jaqın bolǵanlıqtan kúnde ózi qaytadı. Bir kúni ol baqshadan kiyatırsa, aldınan miyawlap kishkene pıshıq shıǵadı. Onı dár­hal qu­shaqlap, bawırına basadı da, úyine alıp keledi.

-Apa, apa qara kirttay pıshıq tawıp aldım. Biy­shara ash bolıp qalǵan, onı iyt jep qoymasın dep úyge alıp kel­dim,-dedi «jer­den jeti qoyan tap­qanday» quwa­nıp.

-Way-buw, berman kel, tez bet-qollarıńdı juw, onıń dúzde ne jegenin kim bilsin, ústi-bası patas-ǵoy,-dep anası onı shomıldırdı. Gúlayım bolsa awzın tom­paytıp: «Onda pıshıǵımdı da shomıldır, ekewimiz tap-taza bolamız, keyin  ház etip oynaymız»,-dedi.

-Áweli awqatıńdı jep al, soń pıshıǵıńdı shomıl­dıramız. Onı awqatın ıdısqa berip, tazalıqqa úyret, ol ele bala-ǵoy usı bastan nege úyretseń soǵan úyrenedi qızım,-dedi basın sıypalap. Gúlayimnıń yadına bir nárse túskendey «Onda pıshı­ǵımnıń shashın ósirsem bola ma? Onıń da shashı me­nikindey uzın bolıwın qá­leymen»-dedi taqıldap. Anası onıń gápine kúlip jiberdi.

-Há sada qızım-áy, pıshıqtıń shashı óspeydi-ǵoy, onı tazalıqqa úyret dep atırman,-dedi anası kúlkisin zordan basıp.

Aradan kúnler ótip, pıshıq Gúlayimǵa bawır basıp qaldı. Baqshadan kelse dárhal aldınan juwırıp shıǵıp, súykenedi. Gúl­ayım­da onı qushaqlap; «Mur­katay meni saǵınıp qaldıń ba?!»,-dep erkeletedi. Eger Murka ash bola qoysa  tarel­ka­sınıń qasına ba­rıp otıradı. Gú­layım oǵan aw­qatın beredi.

Bir kúni Gú­layımnıń anası Shımbayǵa ájapasınıń úyine qıdırıp ketetuǵın boldı. Bunı esit­ken Gúlayım­da barǵısı keldi. Biraq, pıshıǵın taslap ketiwge de kózi qıymadı. Aqırı ol ketse Murkası ash bolıp, jáne saǵınıp qaladı-ǵoy. Báribir ol anası menen bir kún Shımbayda qonıp, ol jaqtaǵı dosları menen oynaǵısı keldi. Ol sulıw qızıl kóylegin kiydi de, pıshıǵına qaradı. Ol da tap onıń ketip bara­tırǵanın sezgendey, Gú­layımǵa súykenip mi­yaw­ladı. Bir waqıtta Murka juwırıp kelip, ketip ba­ratırǵan Gúlayimnıń ar­qasına sekirip mindi. Pıshıq tap «meni taslap ketpe» de­gendey monshaqtay kózleri menen Gúlayımǵa qaradı. Gúlayim bolsa Murkanı dep ilajsız qıdırıwdan waz keshti.

Gúlnisa Asamatdinova

I.Yusupov atındaǵı mám­leketlik qánige­lestirilgen mektep-internatınıń oqıwshısı