Mashaqatlı miynetleri menen dańqqa erisip, eldiń alǵısına bólengen ustazlarımızdıń kásiplik bayramı respublikamız boylap kóterińki keypiyatta belgilendi. Olardıń biri Qaraqalpaq Mámleketlik Jas tamashagoyler  teatrında «Dańq hám alǵıs sizge, qádirdan ustazlar» atamasında ótkerilgen teatrlastırılǵan bayram keshesi boldı.

Keshe teatr direktorı P.Aytmuratov hám Res­publikalıq málimleme-resurs orayı direktorı Z.Seyt­niyazovalardıń bayramǵa arnalǵan qutlıqlaw sózleri menen ashıldı hám «Eń kóp oqıwshıları kitapxanaǵa aǵza bolǵan muǵallim»,  «Eń kóp kitapları oqılǵan jazıwshı», «Eń kóp kitap oqıǵan ata-ana» nomi­na­ciyaları iyeleri anıqlanıp, olar saltanatlı  túrde sıylıqlandı. Sıylıqlaw máresiminen soń, tama­sha­góyler názerine  «Bayramǵa mirat, Ma­sha­nıń sayaxatı» atlı teatr­las­tırılǵan saz-sáwbetli spektakl, I.Yusupov atındaǵı Mámleketlik qánigelestiril­gen mektep-internatı oqıwshıları hám Res­publikalıq málim­leme-resurs orayınıń «Inglis tili» dógeregi aǵzaları at­qa­rıwındaǵı bayramǵa ar­nalǵan qosıq hám taqmaqlar usınıldı.  Keshe dawamında shólkemlestirilgen biri-birinen mazmunlı hám qızıqlı  kitaplar kórgizbesi bayramǵa jáne de zawıq baǵıshladı.

Záripbay Yaxiyaev

arnawlı xabarshımız

avtordıń túsirgen súwreti