Oqıwǵa barıwdı asıǵıslıq penen kútip júrgen úkem Asadbek Xojamuratov bıyıl paytaxtımızdaǵı 40-sanlı ulıw­ma bilim beriw mektebiniń 1-«a» klasına qádem qoydı. Prezident atasınıń papkası menen oqıw quralların alǵan kúni quwa­nıshınıń shegi bol­madı. Úyge keliwden ata-anama júregi sháwkildep, birme-bir alǵan oqıw quralların kórsetip, maq­tandı. «Bárekella balam, endi sen Prezident atańnıń, ustaz­larıńnıń isenimin aqlap, oqıwda jaqsı bahalarǵa oqıwıń kerek. Hárdayim úlgili, tártipli, jaqsı minez-qulqıń menen bas­qalarǵa órnek bolıwıń kerek»,-dep anam úkemniń marapatın berdi. Mine, sonnan berli úkemniń qolınan kitabı, dápter ruchkası tús­peytuǵın boldı. Hár kúni oqıwdan keliwden qanday hárip yaki, san ótkenligin kórsetip júrgeni-júrgen. Shay, awqatın ishpesten ash bolıp tursa da, úyge tapsırmasın orınlamaǵansha dasturxan basında otırmaydı. Soń ta­yarlap bolǵannan soń, biz­lerge qáte bar-joqlıǵın tek­sert­pegenshe kewli kenshi­meydi. Asadbek oqıwǵa júdá ıqlaslı. Ol mektepke barmay turıp-aq háriplerdi úyrendi. «Alipbe» kitabın alǵan kún ol ushın úlken bayram boldı. Muǵallimi Júzimgúl Bayniyazova onıń álleqashan háriplerdi úyrenip alǵanın kórip; «Báre­kella, Asadbek, usı ǵayratıńdı, talap­shańlıǵıńdı jazdırmay, oqıwǵa intańdı kúsheytseń, erteńgi kúni mektebimizdiń maqta­nıshına aylanasań»,-dep maq­tawın asırdı. Ustazınıń, ata-anamnıń marapatı onı ele de jaqsı oqıwǵa, tártipli, zeyinli bolıwǵa talpındırdı. Asadbek kishkene bolsa da, bos waqtın biykarǵa jibermeydi. Basqa dosları kóshede oynap júrse, ol úyde bir nárselerdi dáp­terine shıjbaylap otırǵanı-otırǵan. Men de úkemniń bun­day jaqsı pazıyletin kórip súysi­nemen. Álbette, ol klasınıń eń bilimli, úlgili oqıwshısı bolıp, mektebiniń maqtanıshı bola­tuǵınına ise­nemen.

Indira Saylıbaeva

Paytaxtımızdaǵı 40-sanlı ulıwma bilim beriw mek­tebiniń 9-klass oqıwshısı