Meniń idealımdaǵı qahar­manım kim bolıwı múmkin? Álbette, bárshe balalar birinshi gezekte ustazlarına yaki bol­masa ata-analarına háwes etip, solarday bolıwdı qáleydi. Olardı ómirindegi ideal qaharmanlarım dep sózsiz ayta aladı. Al, men Ótepbergen atamdı idealımdaǵı qaharman dep isenim menen ayta alaman. Sebebi, ol meniń dóretiwshilikke bolǵan ıqlasımdı oyattı. Bál­kim, jurnalist atamnıń talantı maǵan ótken shıǵar?! Meniń kish­kene maqa­lalarım «Jetkinshek»te kórine baslaǵannan atam quwanıp, ma­rapatımdı berip, dóretiwshilikten qol úzbewimdi tákirar-tákirar aytadı. Men biy­karǵa atama uqsap jurnalist bolıwdı qálemedim. Atam 40 jıl da­wamında baspa sóz hám ǵalaba xabar quralları tarawında hár qıylı lawazımlarda jemisli miynet etti. Ásirese, ol «Bilim» baspası hám «Erkin Qaraqalpaqstan» ga­zetalarında kóp jıllar miynet etip, sal­maqlı úlesin qostı. Jaqında atam Ótepbergen Bay­lepesov 80 jasqa shıqtı. Bul qutlı sáne shańa­raǵı­mızda saltanatlı túr­de bel­gilendi. Sonda atamnıń kásiplesleri, dosları atama arnap kóp qosıqlar jazıptı. Men bul qosıqlardı tıńlap otırıp, atamnıń ómir jolı márt­liklerge, tabıslarǵa tolı ekenligin túsinip jettim hám burınǵıdan da beter atama háwesim arttı. Sol waqıtta men de atamday el súygen, ardaqlaǵan jurnalist bolaman dep kewlime túydim. Men de atamdı qutlı jası menen qut­lıqlaǵanımda ol: -«Bárekella naǵız atasınıń balası, keleshekte qálemiń ótkir, talantlı jurnalist bolǵaysań!»-dep aq pátiyasın berdi.

Men álbette atamday insan bolıwǵa háreket etemen hám onıń isenimin aqlaw ushın oqıp-izleniwden sharshamayman.

Sulayman Qalbaev

Shımbay rayonındaǵı 44-sanlı ulıwma bilim beriw mektebiniń oqıwshısı