Shákirtim Juldız Sulaymanova súwret salıwǵa júdá qızıǵadı. Ol jaqında Zulfiya atındaǵı mámleketlik sıylıq ushın ótkerilgen tańlawdıń rayonlıq basqıshında, salǵan súwretleri menen qatnasıp, birinshilikti iyelep, respublikalıq basqıshqa belsene qatnasıp qayttı.

Shákirtim haqqında tolıp-tasıp, maqtanısh etip aytıwǵa haqılıman. Usı maqalanı jazıwıma túrtki bolǵan wa­qıyanı aq qaǵazǵa túsirgenime de biraz waqıt boldı. «Hesh­ten kesh…» bolsa da meniÅ„ menen balalıǵımnan jaqın, sırlas dos bolıp qalǵan «Jetkinshegi»me jaqında jetkerdim.

Ilgeride mektebimizdiń oqıwshıların Shımbay rayo­nındaǵı akademiyalıq liceyde jaylasqan Ózbekstan Qahar­manı, Ózbekstan hám Qa­raqalpaqstan Xalıq shayırı Ibrayım Yusupovtıń muzeyine alıp barǵan edik. Aytayın degenim, muzeyge oqıwshım Juldız ózi salǵan I.Yusupovtıń portretin mektebimizdiń atınan sawǵaǵa berdi. Aradan kóp waqıt ótpey, shayırdıń qızı Ayjamal Yusupova mekte­bimizge qońıraw etip, «Meniń ákemniń súwretin júdá she­berlik penen ózine uqsatıp salıptı. Súwretti salǵan qız benen ushıraspasam bolmaydı. Ótinish, mekte­bińizde ushı­rasıw ótkeriń!»-dedi. Bunnan keyin, waqıttı kóp sozbay, mektebimizge Ayjamal apanı mirát ettik. Ushırasıw sonday tásirli hám mazmunlı bolıp ótti. Oqıwshılar Ayjamal apaǵa ózleri qızıqtırǵan sorawlardı berdi. Ayjamal apa balalıǵın, ákesi haqqında tolıp-tasıp aytıp berdi.

Usı ushırasıwda kópten berli oyıma alıp júrgen shayırdıń Ayjamal qızına arnap jazǵan «Jollıdan sálem» atamasındaǵı qosıǵın tásirli etip oqıp berip, qosıqtıń tariyxı haqqında onnan soradım.

Zal ishi siltidey tındı. Ol biraz únsiz otırıp, erksiz kóz­lerine jas toldı. Soń áń­gimesin jalǵastırdı. Qosıqtıń tariyxın aytıp bergeninde oqıtıwshılar hátteki oqıwshılar da kóz­lerine jas aldı.

Mektebimizdiń oqıwshıları shayırdıń qızına júrek tórinen tilekler bildirip, I.Yusupovtıń qosıqlarınan kórkemlep aytıp berdi. Nama qosıqların sheberlik penen atqardı. Keshe sonday ájayıp, umı­tılmastay bolıp ótti.

Ayjamal Yusupova mektep jámááti, oqıwshılar menen diydarlasıwǵa sebepshi bolǵan jas talant iyesi Juldız Sulay­manovaǵa eń jaqsı tilekler menen oǵan arnap alıp kelgen sawǵasın saltanatlı túrde tapsırdı. -«Juldız qızım, saǵan mıń-mıń raxmet! Talantıńa qayılman. Ákemniń súwretin sonday sheberlik penen salǵan ekenseń. Mine, súwret, haqıy­qıy talant bizlerdi ushırastırdı. Mektep jámáátine de min­netdarman»-dedi ol.

I.Yusupovtıń qosıqların sheberlik penen atqarǵan, jaqsı sorawlar menen belsene qatnasqan oqıwshılarǵa óziniń atınan sawǵalar tapsırdı.

Oqıwshılarım shayırdıń qızınan kóp maǵlıwmatlardı, este qalarlıq, shayırdıń ómirindegi qızıǵarlı waqıya­lardı esitip bir dúnya azıq aldı. Ayjamal apası menen qıymay xoshlastı.

Bul ushırasıw meniń ózimde de basqasha tásir qaldırdı. Ádebiyatqa, dóre­tiwshilikke bolǵan qızıǵıw­shılıǵım arttı. Oqıwshılarım da, maqala, qosıqlar dóretip atır. Bunday ushırasıwlardıń balalarımız ushın áhmiyeti úlken ekenligin ańladım.

Oqıwshım Juldızǵa «Ta­lant-talpınıs penen jasaydı», degendey talantıńdı jeti­lis­tirip, xalıqtıń názerine ilinip, ullı xudojnik bolıp jetilisiwine tilekleslik bildiremen.

Ibrayım Yusupovtıń tuwı­lıp ósken mákanı Shım­baydan ele ullı talant iyeleri jetilisip shıǵarı sózsiz!… Men oǵan isenemen. Sebebi, Shımbay talantlılar elatı.

Paraxat TÁJENOV

Shımbay rayonındaǵı 11-sanlı ulıwma bilim beriw mektebiniń Jaslar awqamınıń jetekshisi