Prezidentimizdiń kitapqumarlıqqa baǵdarlanǵan Qararı mektep oqıwshıları arasında kitap oqıwǵa degen qızıǵıwshılıqtı jáne de arttırdı. Bul boyınsha bir neshe respublikalıq tańlawlar shól­kemlestirilip, olar arqalı mektep oqıwshılarınıń ruwxıy dúnyasın bayıtıw, olarda erkin hám kritikalıq pikirlew qábiletin rawajlandırıw, ideyologiyalıq hújimlerge qarsı salamat immunitet payda etiw sıyaqlı maqsetler orınlanbaqta.

Jaqında ǵana Respublikalıq má­limleme-resurs orayı «Balalar kitap­xanası»nda usınday tań­lawlardıń biri–«Jas kitap­qu­marlar» tańlawınıń Qa­raqalpaqstan Res­publikalıq basqıshı bolıp ótti. Tańlawǵa hár bir rayonda jeńimpaz bolǵan mektep oqıw­shı­larınan ibarat 15 topar qatnastı. Dáslep ilajdıń ashılıw keshesi ótkerilip, onda «Balalar kitapxanası»nıń direktorı orınbasarı Q.Abipov kiris sóz sóyledi. Oqıwshılardı tóreshiler quramı hám tańlaw shártleri menen tanıstırdı.

Tańlaw eki shártten ibarat boldı. Birinshi shártte topar­larǵa eki minut ishinde óz­bek hám shet el áde­biya­tı­nan alınǵan bes sorawǵa juwap beriw wazıypası qoyıl­dı. Bul shártte Taxtakópir rayonınıń «Kewil gilti-kitap», Shoma­nay rayonınıń «Ullı maq­setlerge umtılıwshı jaslar», Ellikqala rayonınıń «Shijoatli kitobxonlar» toparları barlıq sorawlarǵa tez hám anıq juwap berip, joqarı ball alıwǵa eristi. Al, ekinshi shártte oqıwshılardıń talantlılıǵı hám aktyorlıq she­berligi sınnan ótti. Bul shártte olar kórkem shıǵarmalardan úzindilerdi saxnalastırıp, shı­ǵarma qaharmanın obrazlı ashıp beriwi talap etildi. Qızıqlı ótken ekinshi shárt juwmaǵında Shımbay, Qaraózek, Taxta­kópir, Tórtkúl, Ellikqala, Qońırat rayonlarınıń kitapqumar oqıw­shıları ádebiy-kórkem shıǵar­malardıń qaharmanları obraz­ların tásirli hám tábiyǵıy jetkerip bergenligi ushın joqarı ballardı qolǵa kirgizdi.

Jarıs juwmaǵında tóreshiler tárepinen eki shárt boyınsha jeńimpaz hám sıylı orınlar anıq­landı. Juwmaǵında, Taxtakópir rayonınıń «Kewil gilti-kitap» toparı 1-orın, Shomanay rayonınıń «Ullı maqsetlerge umtılıwshı jaslar» toparı 2-orın, Ellikqala rayonınıń «Shijoatli kitobxonlar» toparları 3-orın menen sıylıqlandı. Sonday-aq, Tórtkúl rayonınıń «Mári­fat gúlshanı» hám Xojeli rayonınıń «Shuǵla» toparları tańlaw nominaciyaları me­nen xoshametlendi. Barlıq qala hám rayonlardıń kitap­qumar balaların jazǵı dem alısta bir jerge jámlegen bul res­publikalıq tańlaw júdá kewilli hám kóterińki ruwxta juwma­ǵına jetti. Qaraqalpaqstan Respublikalıq basqıshı jeńim­pazı taxtakópirli kitapqumar balalarǵa iyul ayında Tashkent qalasında ótkeriletuǵın sońǵı sheshiwshi basqıshqa jollama berildi.

B.SULTAMURATOV

arnawlı xabarshımız