Usı jıldıń 10-16-iyun kúnleri Nókis qalasında «Seni jırlayman zamanlas!» Ózbekstan teatrlarınıń  besinshi respublikalıq festivalı ótkerildi. Ulıwma 11 mámleketlik teatrdıń bir-birinen ájayıp spektaklleri qatnastı. Festival sheńberinde qatnasıwshılar bir qatar rayonlarda, sonday-aq, Moynaq rayonında da saparda boldı. Bul saparda bizler de joldas boldıq. Rayon orayına kirip barar ekenbiz, bul jerde alıp barılıp atırǵan keń kólemli rawajlandırıw hám abadanlastırıw isleri qızǵın pát alǵanın kóremiz. Bir tárepte jańadan boy tiklegen Amfiteatr, bir tárepte bolsa 1000 orınǵa mólsherlengen stadion rayonǵa ózgeshe sán bermekte.

Eń dáslep, rayondaǵı 2-sanlı balalar muzıka hám kórkem óner mektebinde boldıq. Bul jerde bizlerdi jıllı júzlilik penen kútip aldı. Miymanlar mektep oqıwshılarınıń turmısı menen jaqınnan tanıstı. Soń Samarqand wálayatı muzıkalı drama teatrınıń aktyorları rayon xalqına «Ana júregi» atlı spek­taklin qoyıp berdi. Spektakl tamam bolǵannan soń, faede tur­ǵan súwretlerdi tamashalap tur­saq, janımızǵa mektep oqıw­shıları kelip:

-Sizler «Jetkinshek»ten kel­dińiz be?,-dep soradı. -«Awa» de­­genimiz sol, olar quwanıp qaldı.

-Bizler «Jetkinshek» gaze­tasın súyip oqıymız,-dedi ózin Arıslanbek Joldasbaev dep tanıs­tırǵan bala. -Házirgi waqıtta rayondaǵı 4-sanlı ulıwma bilim beriw mektebinde oqıyman. Klaslaslarım menen gazeta redak­ciyasına barǵımız keledi. Sizlerdiń kelgenińizdi kórip quwanıp qaldıq.

-Rayonımızda alıp barılıp atırǵan jumıslar bizlerdiń oqıwımızǵa da óz unamlı tásirin tiygizip atır. Mek­teplerimiz zamanagóy oqıw qural­ları, inventarlar menen támiyin­lenbekte. Jańa stadion, balalar maydanshası, mádeniyat orayı biz balalar ushın úlken sawǵa boldı,-deydi ol.

-Jazǵı dem alısta 2-sanlı mek­teptegi kompyuter dógeregine barıp atırman. Bul jerde ustazımız Áziza Aytmuratova bizlerge kom­pyuterdiń túrli baǵdarlamaların úyretedi. Úyde kitaplar oqıyman, kóbinese tariyx kitaplarǵa qızı­ǵaman. Ullı babamız Baburdıń ómirine baylanıslı shıǵarmalardı, detektiv kitaplardı oqıyman,-deydi 4-sanlı ulıwma bilim beriw mek­tebiniń oqıwshısı Qalımjan Tátibaev.

Balalar menen qızǵın gúrriń ketip atırǵanda avtobusımız «Korabller qoyımshılıǵı»na jóne­mekshi ekenin ayttı. Moynaqlı balalar menen xoshlasıp, eski Aral boyına-«Korabller qoyımshılıǵı»na jol aldıq. Bala­lı­ǵımızdı eleslep bizler de baqan­shaqlar terdik.

Bunnan keyingi mánzilimiz rayondaǵı úlke tanıw muzeyi boldı. Bul muzey Aral ármanın sózsiz sáwlelendirgen. Bul jerde belgili xudojniklerdiń bir waqıtları tolıp-tasqan teńiz, balıqshılar ómirinen berilgen kartinalar, ósimlik hám haywanatlar dúnyası, Moynaq xalqınıń kiyiniw máde­ni­yatınan baslap, jasaw tárizine she­kem orın alǵan. Miymanlarǵa Aral teńizi haqqındaǵı hújjetli film qoyıp berildi.

Qullası, festival sheńberindegi Moynaq saparı tek ǵana bizlerdiń emes, qońsı wálayatlardan kelgen miymanlardıń da yadında qalatuǵın sapar boldı. Ásirese, rayon bala­larınıń biyǵubar kózlerinde erteńgi kúnge bolǵan úmit, isenim barlıǵın kórdik. Jıl basında kóz ashqan bulaqlarda tosınnan bolmasa kerek. Moynaqtıń ele de gúllene beriwin, rawajlanıwın tilep, Nókiske jol aldıq.

Ádilbek LATIPOV

QMUniń jurnalistika tálim baǵdarınıń studenti