Bir kúni apam menen birge ájaǵamnıń úyine  miymanǵa bardıq. Esik ashıq biraq, hesh kim joq. Tıp-tınısh. Dalalarǵa suw sewip, basına oramal tartqan sińlime kózim tústi.  Apam ekewimizdiń aldı­mızǵa juwırıp shıǵıp  sálem berdi. Qolı­mızdan uslap ishke qaray mirát etip, shaqqan ǵana kór­peshe salıp, dastur­xandı da bezep tas­ladı.  Apa, den sawlı­ǵıńız jaqsı ma, úyge bayaǵıday kóp kel­meytuǵın bolıp ket­tińiz,-dep hal-awhal soradı. Meniń bolsa sińlimniń bunday til alǵısh, miymandos bolǵanın kórip kózim quwandı. Kóp waqıt ótpey ki­shem de kirip keldi. Sińlim Muslima bolsa anasınıń qolındaǵı zatlardı kóterisip úyge apam menen ájapam keldi dep awqat isleyik dep asxanaǵa juwırıp kirip, men ózim-aq tayarlay beremen,-dedi. Bizler onıń aytqan sózlerine kúlisip otırmız. Sińlim jańa ǵana 8 jasqa shıqqan bolsa da, túsimpaz, aqıllı bolıp qalıptı.  Mus­limadan kishkentay eki inisi de daladan juwırıp  kirip keldi. Ústi-bası shań-shań. Birewiniń murnınıń qanap kiyatırǵanın kórip, apam dárhal ornınan turdı: «Amanlıq pa, balalarım, ne boldı?»,-dep soradı. Olardıń bet-qolların juwıp, ústi-basın tazaladıq. Sińlim Mus­lima bolsa ora­maldı ızǵarlap ákelip, ne boldı, Al­pamıs, birew urdı ma dep bet oramaldı basına qoyıp otırdı. Baǵana saǵan sonsha ayttım, úyde otırıp kitap oqı, keyin arqayın oynaysań  dep edim. Mine ayt­qandı qılmaǵannıń aqıbeti nelerge alıp keldi?! Kórdiń be dep aytıp atırǵan sózlerin esitip apam ekewimiz hayran qalıp bir-birimizge qaradıq. Tap úlken adamdı kishireytip qoyǵanday. Ol sonday aqıllı, miyrimli, shaqqan qız. Kishkene bolsa da jası úlkenlik etip, úkelerine tuwrı jol-joba berip atırǵanın kórip súysindik.

Húrziya ERMEKBAEVA

QMUniń jurnalistika tálim baǵdarınıń 2-kurs studenti