Redakciyaǵa kelgen kú­nim ámeliyat basshımız Dariyxa apa Úbbiniyazova maqala jazıwımız ushın bir neshe temalarda  tapsır­ma­lar  berdi. Olardıń arasında balalıqtaǵı bolıp ótken waqıyalarıńızdı  jazsańız  da boladı degen edi. Ustazım­nıń usı sózinen  keyin kish­keneligimdegi bir waqıya esime túsip ketti.

«Balalıǵım-patshalıǵım»,  dep biykarǵa aytpaǵan eken. Kishkeneligimde qansha ójetlikler qılsam da, apam maǵan qattı sóylep, qol kó­termeytuǵın edi. Áste aqı­rınlıq penen túsindirip aytatuǵın edi. Elege shekem balaǵa qara­ǵanday qaraydı. Awırıp qalsam qasımnan shıq­paydı.  Ákem  de jumıs­tan qaytıp kiyatırıp hár túrli nárselerdi ákelip, átira­pımda pármana.

Házir 20 jasta bolsam da, elege shekem ata-anamnıń erkeletip álpeshlegeninen keyin ózimdi kishkene ba­laday sezemen. Kishkene­li­gimde ele mek­tepke barǵan joq edim. Bir kúni úyimizdiń ishi menen sóylesip otır­ǵanı­mızda, anam me­niń menen  oynap há­zillesti. Men oǵan dárhal qapa bolıp qaldım. Ashıw­lanıp bir neshe kún anama ókpelep sóylemey júr­dim.  Bir kúni anam bazar­lawǵa ketti.

Anam bazardan ákelgen zatların shıǵarıp atır­ǵanda, «qızım, mennen qapa bolıp júrmesin dep pryanik aldım»,-dedi ol kúlimsirep. Usı sózden keyin pryanik­lerdi jep basladım. Onı jep otırıp,  anamnan biykarǵa ashıw­lanıp júr­genimdi tú­sin­dim. Aradan biraz waqıt ótti. Bir kúni erte úyge kelsem, úyde anam­nan bas­­qasısınıń bári bar. Dárhal anama qońıraw etip, qay jerde ekenligin soradım. -Dúkanǵa shı­ǵıp edim mine baratır­man qızım,-dedi. -Jaqsı keldińiz be qızım, búgin ertelew qay­tıpsań-ǵoy,-dedi ol shay menen ishiwge pryanik alǵanın aytıp. Onı kórip jáne bir waqıyanı esledim. Bir kúni anamnıń bazardan alıp kelgen pryanikleriniń hám­mesin úydiń qasınan ótip turǵan japqa ıǵızıp jibergen edim. Biraq, onı hesh kimge ayt­padım. Úyimizdegi iyt kirip jep ketken dep aldadım. Olardı men islegenimdi aytsam baqıradı dep qorqıp iytke jala jawǵan edim-dá! Onı esitip ákem iytti ólgen­she urdı. Aradan biraz waqıt ótketbeb soń usı   waqıyanı shay iship otır­ǵanda anama aytıp berdim. Anam baqır­madı. Onıń ornına «qızım, sen nandı onday etip zaya­lasań obal boladı»,-dedi. Men anam­nıń aytqan sózi­nen uyal­dım. Ótirik sóylep, iytime jala jawıp, onıń jazıqsız jazalanǵanın oylasam, ózimnen-ózim bir túrli bolıp ketemen. Usı waqıya maǵan qattı tásir etti.

Dinora FAYZULLAEVA

QMUniń jurnalistika tálim baǵdarınıń studenti