Nókis qalalıq Xalıq bilimlendiriw bóliminiń jollaması menen házirgi kúnleri respublikamızdaǵı ulıwma bilim beriw mektepleriniń bir topar oqıwshıları Tashkent qalası hám wálayatlardaǵı balalar dem alıw hám sawallandırıw oraylarında kewilli dem almaqta. Olardıń sapar waqtındaǵı qáwipsizligin tá­miyinlew, úyden alısta bolǵan waqtında ruwxıy jaqtan qollap-quwatlaw, ámeliy járdem beriw maqsetinde hár bir toparǵa bir pedagog-tárbiyashı bekitilgen. Jaqında Tashkent wálayatındaǵı «Chotqol» balalar dem alıw hám sawallandırıw orayında dem alıp atırǵan nókisli mektep oqıw­shılarınıń jazǵı dem alısın qalay ótkerip atırǵanlıǵı haqqında olardıń pedagog-tárbiyashısı Nókis rayonındaǵı 22-sanlı ulıwma bilim beriw mektebiniń oqıtıwshısı Gúlayım Úsenova menen telegram tarmaǵı arqalı sáwbetlestik.

-Házirgi kúni mámleketimiz tárepinen hár bir balaǵa úlken itibar berilip, olardıń tıyanaqlı bilim alıwı, sabaqtan tıs waq­tında hár qıylı dógerekler arqalı óz qábiletlerin júzege shıǵarıwı, jazǵı dem alısın kewilli hám únemli ótkeriwi ushın barlıq qo­laylıqlar jaratılǵan. Men bas­shı­lıq etip atırǵan topar Nókis qalasında jaylasqan mektep­lerde oqıytuǵın 30 oqıwshıdan ibarat bolıp, usı jıldıń 8-iyun sá­nesinen baslap Tashkent wá­layatındaǵı «Chotqol» balalar dem alıw hám sawallandırıw orayında kewilli dem alıp atır. Dem alıw orayı tawlı aymaqta jaylasqanlıqtan bul jerdiń ha­wa-rayı hám tábiyatı barlıq balalarǵa birdey unadı. Máke­me basshılıǵı tárepinen dem alıwshılar ushın vitaminlerge bay bes mezgil awqat beriledi. Sonday-aq, balalardıń bos waqtınan únemli paydalanıwı maqsetinde hár qıylı ilajlar, sport oyınları, mádeniy hám kórkem óner kesheleri hár kúni ráń-báreń mazmunda ótkeri­ledi. Usınday ilajlardan «Spor­takiada», «Kewilli startlar» sport jarıslarında biziń topa­rımızdıń balaları da belsene qatnasıp atır. Olardan Nókis qalasındaǵı 12-sanlı ulıwma bilim beriw mektebiniń oqıw­shısı Ayjamal Saǵındıkova óziniń gimnastikalıq shınıǵıwları me­nen bársheni hayran qaldırǵan bolsa, paytaxtımızdaǵı 25-sanlı mektep oqıwshıları Saxıpjamal Matniyazova, Janay Qutlı­mu­ratova hám Aydana Medet­ba­evalar ótkerilip atırǵan ilajlarda belsene qatnasıp, jarıslarda sıylı orınlardı iyelep atır. Bunnan tısqarı, balalar ushın hár qıylı er­tekler tiykarında saxnalıq kóri­nisler qoyıp berilip, olar arqalı balalardı milletler aralıq tatıw­lıqqa, doslıqqa, Watansúyiw­shilikke baǵdarlamaqta. Degen menen, dem alıw orayında jazǵı dem alıstı joqarı dárejede ót­keriw ushın barlıq qolaylıqlar bar bolsa da, oqıwshılarım ata-anaların, tuwılıp ósken jerin saǵındı. Olardıń «Chotqol» dem alıw orayında ótkerip atırǵan dem alısın umıtpaytuǵınına ise­nimim kámil. Sebebi, oqıwshı­larım bul jerde jazǵı dem alısın kewilli ótkeriw menen birge Óz­bekstannıń hár qıylı wálayat­larınan kóplegen doslar arttırdı.

Sáwbetlesken: B.Sultamuratov