Ózbekstan «Adolat» SDP Qaraqalpaqstan Respublikalıq Keńesi tárepinen «Bar mehrimiz saǵan-balajan!» súreni tiykarında biyǵárez donorlıq akciyası shólkemlestirildi. «Hár bir balaǵa mehir-itibar!» aylıǵı sheńberinde Qara­qalpaqstan Respublikası qan quyıw stanciyasında bolıp ótken qayırqomlıq akciyasınan gózlengen maqset medicinalıq járdemge mútáj balalardı qollap-quwatlaw, puqaralardı kewilli ráwishte qan tapsırıwǵa shaqırıw arqalı nawqas balalardıń  ómirin saqlap qalıw, jámiyette insanıylıq hám mehir-muhabbat  ideyaların úgit-násiyatlawdan ibarat.

Azanda erte baslanǵan bul akciya Qaraqalpaqstan Res­publikası Joqarǵı Keńesin­degi partiya frakciya aǵza­ları, Xalıq deputatları, qala hám  rayonlıq Keńes depu­tatları onnan basqa da par­tiya belsendileri hám  kewil­liler qatnastı. Olar nawqas balalardıń sawalıp ketiwine úles qosqan halda qan tapsırıp belsendilik kórsetti.

-Ómirimiz dawamshıları bolǵan perzentlerimizdiń den-sawlıǵın bekkemlewge az ǵana bolsa da úles qosıp atır­ǵa­nımızdan quwanısh­lıman,-deydi, Ózbekstan «Adolat» SDP Qaraqal­paqstan Res­publikalıq Keńesi baslıǵı Nur­lıbay Qayıpbergenov. -Biz­lerdiń qanımız qaysı nawqas balaǵa quyılatuǵının bil­mey­miz. Biraq, eń tiykarǵısı, qaysı bir shańaraqqa quwanısh ba­ǵıshlap, qaysı bir balanıń ómirin saqlawǵa, mine usınday  qayır-saqawatlı iske úles qosıp atırǵanımnan baxıtlıman. Qan beriwdiń qorqınıshlı jeri joq eken. Sebebi, Nókis qalalıq qan quyıw stanciyasında donorlar  ushın barlıq qolaylıqlar ja­ra­tılǵan. Sonlıqtan, watan­las­larımızdı partiya tárepinen shólkemlestirilgen mine usın­day qayırqomlıq akciya­da belsendi qatnasıwına shaqı­raman. Eń baslısı, bul aksiya sheńberinde bir maqset jolında birlesken jerles­le­rimiz mehir-mu­habbat úlgisin jáne bir márte kórsetti.

Aysholpan ORAZÍMBETOVA

Ózbekstan «Adolat» SDP Qaraqalpaqstan Respub­likalıq Keńesi baspasóz xızmeti xatkeri